Euskararen Interpretazio Zentro berrituak urte bat bete du, oraindik ez zara bertaratu?

Joan den astean Euskararen Interpretazio Zentro berriaren (EIZ) lehen urteurrena bete zen, eta une horren garrantzia kontuan hartuta, Iurdana Acasuso Euskararen Etxeko zuzendariak Bilboko San Inazioko kultura-etxe horrek eskaintzen duen esperientziaren nondik norakoak azaldu dizkigu. Egitura moderno, konpleto eta interesgarriak harritu egiten du eskaintzen dituen aukera ugariengatik; izan ere, erreforma egin zuten arte, «zentroa irakurtzera gidatuta zegoen, baina orain askoz 'esperientzialagoa' da». Laburbilduz, euskararen inguruko eduki asko eskaintzen du diseinu berritzaile eta erakargarri baten bidez.

Euskararen Etxeko hainbat aretotan banatua dagoen interpretazio zentro hau zabalik dago astelehenetik ostiralera (10.00etatik 19.00etara), eta larunbatetan (10.00etatik 14.00etara eta 16.00etatik 19.00etara). Egunero bertaratzen dira Bizkaiko, Gipuzkoako eta Arabako ikastetxeetako ikasleak (Lehen Hezkuntzatik Lanbide Heziketara) bisita gidatua egitera, baita euskaltegi, hizkuntza-eskola, unibertsitate eta elkarte ezberdinetako taldeak ere. Era berean, gidariek norbanakoei arreta emateko tarte batzuk ere badituzte, euskaraz, gaztelaniaz edo ingelesez (nahiz eta eduki guztiak frantsesez ere irakur daitezkeen). Gainera, iraganeko erakusketan ez bezala, bisita gidaririk gabe ere egin daiteke «eta horrek bisitatzen gaituzten norbanakoen kopurua nabarmen handitzea ekarri du», dio Acasusok. Guztira, 6.252 pertsona igaro dira bertatik.

Duela urtebetetik hona egin dezakegun doako bisitara itzuliz, esperientzia hau eraikinaren harreraren ondoko gelan hasten da. Gaiari heltzeko, osasunari, kulturari, hezkuntzari eta abarri buruzko datuak ezagutzeko aukera eskaintzen zaie bisitariei, pantaila interaktibo bateko botoietan sakatuz. Zenbat lagunek ikasi zuten euskaldunen hizkuntza 2023an Asian? Zein izan da ikus-entzunezko ekoizpenen edo bideojokoen azken aldiko bilakaera? Zenbat lan argitaratu ziren iaz euskaraz? Hau da, interesdunek informazio mordoa jasotzen dute bisita hasi eta gutxira, Eustat inkesta soziolinguistikoaren, Osakidetzaren eta beste erakunde batzuen azken datuei esker.

Bisitak aurrera egin ahala, sorpresa berriak agertzen dira. Eva Tuneu museografoak diseinatutako hasiera eta amaierarik gabeko ibai bat proiektatzen laguntzen duten ispiluz betetako aretoan, adibidez, 'Askotarikoa', 'Transmisioa' eta 'Komunitatea' eremuek aukera ematen diote bisitariari euskalki ezberdinak entzuteko, gurasoengandik seme-alabengana hizkuntza transmititzen joan diren familien argazkiak ikusteko, abian jarritako lehenengo ikastoletako irakasleen esperientziak ezagutzeko eta euskal hizkuntzarentzat mugarri izan diren Korrika, Bai euskarari eta Durangoko Azoka bezalako herri ekimenak nola sortu ziren gogoratzeko.

Era berean, udalerri jakin batzuetan bakarrik erabiltzen diren hitz batzuei buruzko informazioa jasotzeko aukera ematen da, hitz batzuk elkartuz (jolas+toki, begi+zulo...) beste batzuk sortzeko gonbita egiten da, euskararen hitz zaharrenetako batzuk ezagutarazten dira, eta beste hizkuntza batzuetatik zein jaso ditugun eta guk beste hizkuntzetara zein ekarpen egin ditugun jakinarazten da ere. Jakina, euskararen historiaren unerik garrantzitsuenak erakutsiko zaizkigu, Babeleko Dorretik abiatzen den eta Irulegiko Eskua, Axularren 'Gero' lana eta beste zenbait gertaera zehatz erakusten dizkigun infografia kronologiko baten bidez. Ildo horretan, etorkizuneko erronkei buruz hitz egiteko aukera ere izango dugu.

Hori gutxi balitz, bisita bukatzear dagoela, bi jarduera original eta dibertigarritatik igaroko gara: lehenengoa, fotomatoi moduko bat, non, ausazko irudi batzuen aurrean ditugun erreakzioak kontuan hartuta, bertso pertsonalizatua jasoko dugun opari bezala; eta, bigarrena, karaoke bat, non kantari gisa ditugun dohainak erakutsi ahal izango ditugun Kirmen Uriberen olerkian inspiratutako Mikel Udangarinen 'Munduari begiratzeko modu bat' kanta abestuz. Ikastetxeen kasuan, gainera, ordubeteko bisita-tailer gehigarria egiteko aukera eskaintzen da.

Horregatik guztiagatik, oraindik Euskararen Interpretazio Zentrora joan ez bazara, ez dakigu zeren zain zauden!

• Temas
• Euskera