https://static.elcorreo.com/www/menu/img/zurekin-desktop.jpg

Euskararen erabileran eragiten duten gakoak ardatz, jardunaldia antolatu dute

Erramun Osa Euskaltzaindiko idazkariordea moderazio lanetan arituko da./
Erramun Osa Euskaltzaindiko idazkariordea moderazio lanetan arituko da.

Mintegia ostegunean izango da Sabino Arana Fundazioaren egoitzan, Bilbon

AMALIA IBARGUTXI

«Hizkuntza bat, gurea nahiz inorena, ez da gizarteko mintzabide eta adierazpidea besterik. Ona da, beraz, elkarrekin mintzatzeko eta elkarri gogoetak adierazteko delarik, mintzatzeko eta adierazteko balio duelako». Koldo Mitxelenaren esaldi hori azpimarratu dute Euskaltzaindiak eta Sabino Arana Fundazioak, antolatu duten mintegiaren berri emateko. Izan ere, euskararen erabileran eragiten duten gakoez gogoeta egiteko mintegia antolatu dute ostegunerako, uztailaren 12rako, Sabino Arana Fundazioaren egoitzan, Bilbon.

Goiz osoa iraungo du mintegiak, 9:00etan hasi eta eguerdira arte. Juan Mari Atutxa Sabino Arana Fundazioko lehendakariak, Andres Urrutia euskaltzainburuak eta Bingen Zupiria Eusko Jaurlaritzako Kultura eta Hizkuntza Politikako sailburuak hasiko dute mintegia. Jarraian, 09:30ean, hitzaldia egingo du Jon Aizpurua Eusko Jaurlaritzako Hizkuntza Politikarako Sailburuordetzako Plangintza eta Azterlanetako arduradunak, 'Erabileraren gakoak azterketa soziolinguistikoen argitan' izenburukoa.

Halaber, Garbiñe Bereziartua eta Beñat Muguruza Euskal Herriko Unibertsitateko (EHU) irakasleek euskararen erabileraren gakoak egoera informaletan eta gazteen arteko hizketa-moldeak izango dituzte hizpide, eta Joxerra Gartzia idazle eta irakasleak gai bera landuko du jarraian. Ondoren, elkarrizketarako tartea izango da, Ibon Manterola EHUko irakasleak moderatuta.

Parte hartu nahi baduzu, izena eman

Topaketaren bigarren zatian, 11:45ean, euskararen erabilera sustatzeko politika publikoen inguruan jardungo dira. Lehenengo 'Euskararen erabilera hazteko eta kalitatea hobetzeko ildoak, Eusko Jaurlaritzaren euskararen agenda estrategikoaren (2017-2020) arabera' aurkeztuko ditu Miren Dobaran Hizkuntza politikarako sailburuordeak.

Eta amaitzen hasteko, euskararen egoera eta Nafarroako Gobernuaren Plan Estrategikoaren lan-ildoak aztertuko ditu Mikel Arregi Nafarroako Gobernuko Euskarabidea Euskararen Nafar Institutuko zuzendari nagusiak.

Azkenik, Joseba Erremundeguy Euskararen Erakunde Publikoko Misio kargudunak, 'Euskararen erabilera sustatzeko politika publikoak Ipar Euskal Herrian' izango du aztergai. Mintegia Erramun Osa Euskaltzaindiko idazkariordeak moderatutako beste tarte batekin bukatuko da. Jardunaldian parte hartzeko izena eman behar da, info@euskaltzaindia.eus posta elektronikora idatzita edo 944 158 155 telefonora deituta.

Temas

Euskera

Contenido Patrocinado

Fotos

Vídeos