https://static.elcorreo.com/www/menu/img/zurekin-desktop.jpg

Euskaltzaindiaren mendeurrena ospatzeko kontzertua izango da bihar, Gasteizen

Nurat abesbatzako kideak./Musikalde.com
Nurat abesbatzako kideak. / Musikalde.com

Kontzertua Gasteizko Nurat Abesbatzak eta Bilboko Koral Elkarteko Euskeria koruak emango dute, Principal Antzokian

PAUL PICADO

Euskaltzaindia 1919. urtean sortu zen, eta bere mendeurrena ospatzeko 'Mende Berria Kantuz' izeneko kontzertua antolatzen ari da, Andres Urrutia euskaltzainburuak dioenez, «Euskaltzaindiaren jarduna ez baita akademikotasunera bakarrik mugatzen». Mendeurrena dela medio, antolatu dituzten kultura ekimenetan euskal gizartea ere parte har dezan ere gonbidatu du .

Mendeurrena iaz hasi zen ospatzen, urrian, Arantzazun egindako biltzarrarekin, eta urtebete emango dute ospakizunekin. Arantzazun bertan estreinatu zuten 'Mende Berria Kantuz' ikuskizuna, baina Iruñean eta Bilbon ere izan dira dagoeneko. Kontzertu guztietan Bilboko Koral Elkarteko Euskeria koruak parte hartuko du, eta harekin batera, lurralde bakoitzeko korua arituko da.

Gasteizen txanda bihar ostiralean izango da, Principal Antzokian, 20:30ean, eta bertan, Nagore Alanguak zuzendutako Nurat Abesbatza izango da. Abesbatza 2012ko urrian sortu zen Musikalde Kultur Elkartearen barruan, berez, Araban koruen kultura sustatzeko, baina baita Nurat eta Oskarbi abesbatza berriak bultzatzeko helburuarekin ere.

Abesbatza honek, besteak beste emanaldi hauetan parte hartu zuen: Gernikako bonbardaketaren 75. urteurrenean, Berlinen, La Caixako Gizarte Ekintzaren Mesias-en, eta Carmina Burana obran, Gasteizko kontserbatorioko orkestrarekin. Horrez gain, Murtzian eta Katalunian ere izan dira.

Ostiraleko kontzertuan euskal kanta hauek abestuko dituzte: 'Gaztelugatxe' (Oskorri), 'Aitarik ez dut' (Errobi), 'Arraroa noski' (Jabier Muguruza), 'Bizkaia Maite' (Benito Lertxundi), 'Aitormena' (Hertzainak), 'Azken dantza' (Pantxoa ta Peio); 'Baga biga klik', 'Sarri sarri' (Kortatu), 'Lau teilatu' (Itoiz), 'Ilargia' (Ken Zazpi), 'Negua joan da ta' (Zea Mays) eta 'Euritan dantzan' (Gatibu). Kontzerturako sarrerak hemen eros daitezke.