https://static.elcorreo.com/www/menu/img/zurekin-desktop.jpg

Euskaltzaindiak Nazioarteko Onomastika jardunaldia ospatuko du Gasteizen

Programa honek onomastikaren ikerketatik abiatuta, izenak normatibizatzeko eta gizarteratzeko prozesua aztertzea eta horretaz gogoeta egitea du helburu./
Programa honek onomastikaren ikerketatik abiatuta, izenak normatibizatzeko eta gizarteratzeko prozesua aztertzea eta horretaz gogoeta egitea du helburu.

Ekainaren 13 eta 14an ospatuko den ekimena doakoa da eta plaza mugatuak aurkezten ditu

UNAI SARRIUGARTE

Euskaltzaindiak Nazioarteko Onomastika jardunaldia ospatuko du ekainaren 13tik 14ra bitartean, Gasteizko Europa Jauregian. Programa honek onomastikaren ikerketatik abiatuta, izenak normatibizatzeko eta gizarteratzeko prozesua aztertzea eta horretaz gogoeta egitea du helburu. Ekainaren 13ko jardunaldia egun osokoa izango da, ekainaren 14koa, berriz, goizean bakarrik egingo da.

Izan ere, onomastika izen bereziak edo propioak aztertzen dituen hiztegigintza edo lexikografiaren atala da. Onomastika honako hiru atal hauetan banatzen da: batetik, antroponimia, pertsona izenak aztertzen dituena; bestetik, toponimia, leku izenak aztertzen dituena; eta, azkenik, bionimia, izaki bizidunen izenak aztertzen dituena.

Euskaltzaindiak, Euskararen hizkuntza akademi ofizialak, zazpi lurralde eta bi enklabetan sailkatzen du aztertzen duen toponimia: batetik, lurraldeei dagokienez: Araba, Bizkaia, Gipuzkoa, Nafarroa, Lapurdi, Zuberoa eta Nafarroa Behera probintzietan; bestalde, enklabeei dagokienez: Trebiñuko konderria eta Villaverde Turtziozko harana.

Onomastika jardunaldietan hainbat pertsonai publikok hartuko dute parte: Roberto Gonzalez de Viñaspre Euskaltzaindiaren Onomastika batzordeko burua, Dorleta Alberdi euskaltzain urgazlea, Joan Anton Rabella (Institut d'Estudis Catalans), Antón Santamarina (Instituto da Lingua Galega), Franco Finco (Università di Udine), Vincenç Rivière (Lo Congrès Permanent de la Lenga Occitana) eta Hervé Gwegen (Ofis Publik ar Brezhoneg) besteak beste.

Jardunaldirako plazak mugatuak dira eta dagoeneko jardunaldietan parte-hartzeko izen emate epea zabalik dago. Ekainaren 10a bitarte info@euskaltzaindia.eus helbide elektronikoan edota 943 42 80 50, 944 158 155, (0) 559 25 64 26 eta 948 22 34 71 telefono zenbakietan izena emateko aukera izango du jendeak. Programa honen sarrera doakoa izango da eta parte-hartzaileek aldi bereko itzulpena izango dute. Era berean, streaming bidez eskainiko dute jardunaldi osoa.

Temas

Euskera