https://static.elcorreo.com/www/menu/img/zurekin-desktop.jpg

Euskalgintzaren puzzlea osatzeko, urtarrilaren 31n egingo da Topaldia, Bilbon

EHUren Bizkaia aretoan egingo dute «euskaltzaleen mugimendua berritzeari begira, Euskaraldiak ekarri dituen aukerez eta erronkez hausnartzeko» jardunaldia

AMALIA IBARGUTXI

Azken hilabeteotan Euskaraldiak sortu duen elkarrizketan gehiago sakontzeko, Topaldia jardunaldia antolatu du Euskaltzaleen Topaguneak urtarrilaren 31rako. Bilboko EHUren Bizkaia aretoan egingo dute. «Euskaltzaleen mugimendua berritzeari begira ekarri dituen aukerez eta erronkez hausnartzeko» osatu dute egitaraua.

Arrakastatsutzat eman dute antolatzaileek Euskaraldia, eta egiten jarraituko dela aurreratu zuten ekimena amaitzean. Izan ere, parte hartzaileen aldetik jaso diren bizipen eta mezuek «erakusten dute ekimenak jende askoren harremanetan aldaketak eragin dituela egunotan», nahiz eta, era berean, hizkuntza ohituren aldaketa-bide luzea ikusten duten oraindik egiteke.

Datozen urteetarako lehentasunei eta kontutan hartu beharreko elementuei begira jartzea izango da Topaldiaren helburua. Horretarako, hizlari ezberdinek bakoitzaren ikuspuntutik helduko diote gaiari, beraien ekarpena eginez. Jasone Mendizabal Topaguneko zuzendariak hasiko du jardunaldia, Euskaltzaleen Topaguneak mugimenduaren egoeraren gainean duen irakurketa eginez.

Jon Sarasua 'Hiztunpolisa' saiakera-liburuan jasotako ideien inguruan ariko da, eta Manex Agirre euskara teknikaria, berriz, lankidetzaren inguruan. Jarraian, Ipar Euskal Herriako hizkuntza erabilera eta ohituren inguruan jardungo da Eneko Gorri.

Mari Luz Estebanek mugimendu feministaren gaitasun eraldatzailea aztertuko du, eta 'Ekarpen lanaren ondorioak eta aurrera begirako proposamena' hitzaldiarekin itxiko dute jardunaldia Euskaltzaleen Topaguneko Elena Laka Muñoz eta Rita Aldabaldetrekuk. Goizeko 9:00etatik arratsaldeko 16:00etara luzatuko da bilkura. Urtarrilaren 23ra arte edo aretoko toki guztiak hartzen diren arte egongo da zabalik bertaratzeko izen ematea, Topaguneko webgunean.

Temas

Euskera