Euskal musika taldeek eta bakarlariek BIME CITY ekimenean izena emateko epea irekita dute

BIME PRO topaketaren barruan BIME CITYn parte hartu nahi duten euskal musika taldeek zein bakarlariek abuztuaren 24ra arte izango dute izena emateko. Epea aste honetan bertan ireki da eta BIME PRO topaketaren antolatzaileek erabakiko dute zer taldek parte hartuko duen urriaren 29an Bilboko Stage Live aretoan izango den kontzertu handian. Horrela, inprimaki hau bete beharko dute.

BIME PRO topaketa 2013. urtean sortu zuten, eta, berez, edozein arlotako profesionalen topagunea da. Besteak beste, musika, kultura eta sormen arloko profesionalak bertaratzen dira, eta negozioak egiteko, ezagutzak partekatzeko eta musikariekin zuzenean edo zeharka lotutako azken nobedadeen berri emateko erabiltzen dute.

Programa orokorra du, eta aurten urriaren 26tik 29ra bitartean izango da. Programaren barruan hainbat jarduera antolatzen dira, hala nola, BIME PRO Fests izeneko jaialdiei buruzko biltzarra; BIME PRO Start Up!, gazte ekintzaileei zuzendutako start up-en topaketa; BIME PRO Campus, prestakuntza zikloa eta Atlantic Music Conferences Symposiuma, herrialde iberoamerikarretik etorritako hamar azoka arte biltzen dituen sinposioa.

BIM CITYren barruan Estatuko zein nazioarteko talenturik onenek parte hartuko dute bi egunetan, eta kontzertuak doan izango dira. Guztira hamahiru herrialdetatik etorritako berrogeita hamar talde baino gehiago izango dira hamaika aretoetan, eta euskal taldeek zein bakarlariek ere beren tokia izango dute topaketa handi honetan. Gainera, Basque Music-ek, ekimenaren arduradunak, diru kopuru bat bideratuko du gastuak ordaintzeko.