https://static.elcorreo.com/www/menu/img/zurekin-desktop.jpg

Euskal Herriko Unibertsitateak eta zenbait euskal eragilek euskal marka aztertzea hizpide duen ikerketa bat jarri dute abian

EHUko Nik aditu taldeak garatuko du ikerketa./
EHUko Nik aditu taldeak garatuko du ikerketa.

Marketinari dagozkion ezagutzak hizkuntzarekin uztartzea da ikerketa honen helburu nagusia

UNAI SARRIUGARTE

Euskal Herriko Unibertsitateak eta zenbait euskal eragilek euskal marka aztertzea hizpide duen ikerketa bat jarri dute abian. Bertan hainbat adituk euskara eta euskal kultura aipatzean jendearen adimenean aktibatzen diren elementuen inguruko azterketa proiektu bat egiten dabiltza. Izan ere, ikerketa honek euskarak eta euskal kulturak estrategia bateratu batean lan egitea du xede.

Olatz Olasok Emun hizkuntza zerbitzuen kooperatibako zuzendariak dioenez, euskara hautu bat da egun eta aukera berri hori indartzeko bide berriak urratu behar dira.

Ikerketa talde hau honako ikerlari hauexek osatuko dute: Irene Garcia, Patxi Azpillaga, Irati Agirreazkuenaga, Angeriñe Elorriaga, Koldo Atxaga, Sergio Monge, Ainara Miguel eta Naroa Jauregizuria. Eta proiektua finantzatuko duten euskal eragileak hauek dira: Euskararen Gizarte Erakundeen Kontseilua, Elkar Fundazioa, Berria Fundazioa, Elhuyar Fundazioa, Aek, Emun, Ikastolen Elkartea eta Euskaltzaleen Topagunea.

Proiektua finantzatuko duten euskal eragileen aurkezpena.
Proiektua finantzatuko duten euskal eragileen aurkezpena.

Lehenik eta behin, euskararen markaren egungo egoera aztertzen dihardute. Etorkizun hurbil batean euskal hizkuntza sustatzea eta hedatzea xede duen egitasmo bat jorratu ahal izateko. Azterketa hau hainbat fasez osatua dago. Ikerketa hau urtarrilean hasi zuten eta lehen atal honetan soilik zortzi eztabaida talde burutu dituzte, hainbat adin tarte eta eremu soziolinguistikotakoak.

Egun azterketa honetatik ondorioztatutako datuak antolatzen dihardute. Ikerketa honen hurrengo pausoa inkesta bat diseinatzea izango da. Izan ere, honen bitartez marka txosten bat landu nahi dute. Bertatik lortutako datuekin lantaldeak aplikazio praktikorako marka estrategiaren proposamena osatu nahi du eta hauxe 2020. urtearen bukaeran aurkeztuko dutela aurreikusi dute.

Aipatu dugunez, marketinari dagozkion ezagutzak hizkuntzarekin uztartzea da ikerketa honen helburu nagusia. Hortaz, euskal hizkuntzan branding estrategia erabiltzen den lehendabiziko aldia da. Eta zer da hori? Marka bat sortu eta eraikitzeko orduan egiten den prozesua. Hau da, marka hori sortzeko aurrera ematen diren urratsak.