https://static.elcorreo.com/www/menu/img/zurekin-desktop.jpg

Euskal Herriko Gazte Orkestra Fundazioak zuzendari berria hautatzeko prozesua jarri du martxan

Euskal Herriko Gazte Orkestra./Mikel Askasibar
Euskal Herriko Gazte Orkestra. / Mikel Askasibar

Hautagaitzak aurkezteko epea uztailaren 15ean amaituko da

UNAI SARRIUGARTE

Euskal Herriko Gazte Orkestra Fundazioak (EGO) zuzendari berria hautatzeko prozesua jarri du martxan. Hautatuak erakundearen kudeaketa zuzendu eta EGOren egitasmoak zehaztu eta ea betetzen diren gainbegiratu beharko du. Parte-hartzaileek uztailaren 15era arte dute hautagaitzak aurkezteko.

Lehen hautaketa prozesua gainditzen dutenei proiektu konkretu bat aurkezteko eskatuko zaie: orkestrarako duten ikuspegi, estrategia eta ekarpenak azaldu eta uztartzen dituena.

EGOko zuzendari nagusi berria Fundazioaren Patronatuaren menpe egongo da. Patronatu hau Eusko Jaurlaritzako Kultura eta Hizkuntza Politika zein Ekonomia eta Ogasuna sailetako ordezkariek osatzen dute.

Kargu berri honek helburu konkretu batzuk izango ditu: batetik, fundazioaren xedeak garatzea eta aurrera eramatea, eta xede horiek lortzeko plan estrategiko bat garatzea; bestetik, harremanetarako eta trukerako tokiko eta nazioarteko sareak sortu beharko ditu, bai eta komunikaziorako tresna eta protokoloak garatu ere.

Fundazioaren helburu nagusiak, berriz, honako hauexek dira: gazteen profesional aurreko heziketari laguntzea; musika balioak sustatzea; eredua garatzea; ikastaroak eta biltzarrak antolatzea; eta informazio eta arreta zentro bat ezartzea.

Lanpostu honetarako hautagaiek baldintza konkretu batzuk bete behar izango dituzte: unibertsitate titulua eskatuko da (lizentzia, gradua edo masterra); zehazki kontuan hartuko da musika kudeaketako ezagutza. Era berean, gutxienezko hamar urteko esperientzia musika kudeaketan, bai eta proiektu berri bat diseinatzeko eta aurrera eramateko gaitasuna ere. Hizkuntzen ezagutzari erreparatuz gero, bi hizkuntza ofizialen -euskararen eta gaztelaniaren- eta ingelesaren goi mailako ezagutza exijituko da.

Euskal Herriko Gazte Orkestra (EGO) 1997. urtean jaio zen, Eusko Jaurlaritzako Kultura Sailak sustatua. Herri honetako musika-tresna jole gazteei orkestra-mailako prestakuntza eskaintzeko helburuarekin sortu zen orkestra. Gizarte-ekintzek fundazioa sortu zuten; Eusko Jaurlaritza Fundatzailea da eta BBK, KUTXA eta VITAL KUTXA, berriz, Babesle Atxikiak.

Euskal Herrian jaio edo bizi diren gazteek osatzen dute orkestra, nagusiki. EGOk urteko bi sasoitan metatzen du bere lana, udako eta neguko oporraldietan, hain zuzen. Euskal geografiako hainbat lekutan egiten du lan hori. Epe horietan EGOko kideek nazioarteko ospea duten irakasleekin lan egiteko aukera izaten dute, eta orkestra-mailan eta ganbera-musikan trebatzen dira.

Temas

Euskera