https://static.elcorreo.com/www/menu/img/zurekin-desktop.jpg

Euskal Herria, surfaren abiapuntu ezin hobea

Surflari bat, olatuak hartzen hasteko prest./Fotolia
Surflari bat, olatuak hartzen hasteko prest. / Fotolia

Euskal kostaldeak eskaintzen duen klima, itsasaldi, haizete eta olatuek surfean aritzeko munduko leku paregabeenetako batean bihurtu dute gure lurraldea

UNAI SARRIUGARTE

Euskal Herrian surfa 60. hamarkadan hasi zen. Nat Young, Mickey Dora, Gary Elkerton edota Tom Curren surflari profesionalak izan ziren aitzindari euskal kostaldean. Izan ere, Getaria eta Miarritzeko hondartzetara etortzen ziren Kantauri itsasoak eskaintzen zituen olatuez gozatzeko asmoz. Kostalde honek eskaintzen duen klima, itsasaldi, haizete eta olatuek surfean aritzeko munduko leku paregabeenetako batean bihurtu dute gure lurraldea.

Euskal Herriak surfa egiteko aukera anitz aurkezten ditu. Hauetako gehienak nazioartean ospe handia bereganatu dute azken urteotan. Batetik, Ipar Euskal Herrian Angleteko edota Miarritzeko hondartzak ditugu. Bestalde, hegoalderago Bidart Centre, Uhabia eta Guetharyko areatzak ditugu, surflarien artean oso ezagunak direnak. Era berean, Hendaiako hondartzak izugarriak dira. Bertako badiak aurkezten dituen ezaugarri anitzak oso aproposak dira surfa egiteko.

Halaber, Hego Euskal Herrian hainbat hondartza famatu daude bai Gipuzkoan eta bai Bizkaian. Gipuzkoan oso ezagun dira Zurriolako hondartza Donostian eta Zarautzeko hondartza, azken hau oso ospetsua da. Azken urteotan Pro Zarautz txapelketa ospatu izan da bertan. Bestalde, Irailero Zarautzen Munduko Surf Txapelketarako puntuagarria den Rip Curl Pro Zarautz proba jokatu ohi da.

Zarauzkoak dira Hodei Collazo eta Aritz Aranburu surflari profesionalak. Aranburu 2007ko Europako Surf Txapelketako irabazlea izan da eta ASP World Tour zirkuituan lehiatzea lortu duen lehenbiziko euskalduna eta bosgarren europarra da.

Mundaka helmuga ospetsua da nazioarteko surfean, Europako ezkerreko olatu luzeena bertan baitago. Hori dela bide, Mundakako itsasadarra Europan argitaratutako turismo eta surf liburuxka askota agertu ohi da. Herri honek aurkezten duen orografia, haizete eta olatu zehatz eta iraunkorrengatik, surfa egiteko munduko lekurik onenetako batean bihurtu dute.

Bertara atzerriko surflariak etorri ohi dira, eta haietako batzuk bertako kanpinean bizpahiru hilabete egiten dituzte. Mundakako uretan nazioarteko surf lehiaketak egin izan dira. Nazioarteko Billabong Mundaka Pro txapelketa esaterako. Era berean, Bakio eta Sopelanako hondartzak ere oso ezagun dira surflarien artean.