https://static.elcorreo.com/www/menu/img/zurekin-desktop.jpg

Etxepare-Laboral Kutxa Sariak bere bosgarren edizioa ospatuko du

Etxepare-Laboral Kutxa Sariak bere bosgarren edizioa ospatuko du
Fotolia

Garaikurrak itzultzaileek egiten duten lana goraipatu nahi du

UNAI SARRIUGARTE

Etxepare-Laboral Kutxa Sariak bere bosgarren edizioa ospatuko du. Lehiaketa honek jatorriz euskaraz idatzitako literatur lanen itzulpenak saritzea du xede, itzulpenak baitira euskal idazleak eta euren lanak nazioartean ezagutzera emateko zubia. Era berean, garaikurrak itzultzaileek egiten duten lana goraipatu nahi du. Jaialdian hautagaitzak aurkezteko epea astelehenean zabaldu zen eta ekainaren 28a arte egongo da zabalik.

Nazioarteko edozein itzultzaile eta argitaletxek har dezake parte lehiaketan. Edonola ere, nahitaezko irizpide batzuk bete beharko dituzte: batetik, aurkeztutako liburua jatorriz euskaraz idatzitako eta argitaratutako literatur lan baten itzulpena izatea; bestetik, itzulpen hori 2018. urtean argitaratutakoa izatea.

Aurtengo lehiaketak sari bakarra izango du. 4.000 euroko diru-laguntza, itzultzaileak eta argitaletxeak erdi bana egin beharko dutena. Era berean, 2.000 euroko laguntza jasoko dute irabazleek saria bertara jasotzera etortzeko edota literatur lana plazaratu den herrialdean sustapen lana ordaintzeko.

Aipatu dugunez lanak aurkezteko epea jada irekirik dago eta ekainaren 28a arte egongo da zabalik. Sari banaketa ekitaldia, berriz, Etxepare Euskal Institutuak eta Laboral Kutxak aurrerago elkarlanean adostuko duten leku eta egunean ospatuko da. Epaimahaia itzulpengintzaren arloko, Etxepare Euskal Institutuko eta Laboral Kutxako zenbait ordezkarik osatuko dute.

Etxepare Euskal Institutuak euskara sustatu eta euskal kultura munduan zabaldu eta ezagutzera ematea du xede. Hori dela bide, literaturan itzulpenak egiteko diru laguntzak eskaintzeaz gaindi, euskal idazleentzat bidaia poltsak ematen ditu eta nazioarteko liburu azoka eta literatura jaialdietan euskal idazleek parte hartu eta euren lanak aurkeztea ahalbidetzen du. Halaber, sariaren bitartez Laboral Kutxak berriro ere euskara eta euskal kulturarekiko duen konpromisoa berresten du.

Temas

Euskera