Etxebizitzetan egindako lapurreten kopuruak gora egin du Bizkaian

Abenduan gora egin du Bizkaian eskalatu ondoren etxebizitzetan egindako lapurreten kopuruak. Ertzaintzak ohartarazi duenaren arabera, lapurrek aldamioak edo leiho erdi-itxiak baliatzen dituzte etxeetan edo etxebizitzetan sartzeko eta barruan lapurtzeko. Antza denez, talde txiki antolatuak dira, eta polizia-jarduera areagotu du delitu-kanpaina horren aurkako prebentzio- eta ikerketa-lanetan.

Lapurrek obretan dauden eta aldamioak dituzten eraikinak baliatzen dituzte batik bat. Aldamioetatik gora egiten dute eta etxebizitzetara balkoietatik edo leihoetatik sartzen dira: irekita badaude zuzenean sartzen dira eta, bestela, bortxatu egiten dituzte. Behin barruan sartuta, batik bat, dirua, bitxiak eta aparatu elektroniko txikiak lapurtzen dituzte. Familia bakarreko etxeetan eta etxebizitzetan ere lapurtzen dute, eta, horretarako, irekita dagoen leiho bat erabili edo, itxita badaude, indarra erabiltzen dute. Oro har, lapurretak arratsaldez egiten dituzte, ordu horretan hutsik dauden etxebizitzak baliatuta, baina batzuetan beste ordutegi-tarte batzuetan ere egin izan dituzte. Agenteek uste dute batez ere beheko solairu eta lehen solairu irisgarriak dituzten urbanizazioak bilatzen dituzten talde txiki antolatuak direla.

Hilabete honetan, zehazki, Ertzaintzak mota horretako ehun bat lapurreten salaketa jaso du Bizkaian. Ehuneko 63 etxebizitzetan izan dira eta gainerakoak etxeetan.

Ertzaintzak etxebizitzetan egiten diren lapurretak delitu estrategikotzat jotzen ditu eta abian du delitu-modalitate hori saihesteko eta ikertzeko ekintza-plana. Nolanahi ere, herritarren laguntza eskatzen du pertsona edo ibilgailu susmagarrien berri emateko. Ertzaintzarekin harremanetan jartzeko SOS-Deiak zerbitzuko 112 telefonoa edo Ertzaintzaren APPa erabil daitezke. Azken horrek 24 ordutan eskaintzen du arreta, eta, ohiko telefono bidezko komunikazioaz gain, whatsapp, sms eta posta elektroniko bidez komunikatzeko aukera ere ematen du. Lehen hiru bide horiek egoera susmagarrien irudiak bidaltzeko aukera ere ematen dute, adibidez.

Laguntza horrez gain, Ertzaintzak herritarrei gomendatzen die etxeko atea giltzez ixtea eta ateetan plastikozko markagailuak edo kola-hariak dauden begiratzea. Beheko solairuetan edo kaletik irisgarriak diren solairuetan leihoak ixtea eta, ahal izanez gero itxiturak eta bestelako segurtasun-neurriak instalatzea gomendatzen die ere bai. Erreforma-lanetan dauden eta aldamioak dituzten eraikuntzak ere lapurren jomuga dira eta, hori dela eta, arreta berezia jarri beharko da, eta balkoietako eta leihoetako ateak ondo itxi beharko dira eta pertsianak jaitsi, eta, ahal izanez gero, segurtasun-neurri aurreratuak ezarri, hala nola alarma duten sentsoreak.

• Temas
• euskera