https://static.elcorreo.com/www/menu/img/zurekin-desktop.jpg

Estreinaldiak eta proposamen berritzaileak, Loraldian

Jon Martinezek ardo bidaia gidatuko du./Loraldia
Jon Martinezek ardo bidaia gidatuko du. / Loraldia

Festibalaren lehenengo astean arrakasta izugarria lortu ondoren (zortzi emanaldietatik zazpitan sarrerak agortu dira), bigarren asterako erabateko

Jan Echevarría
JAN ECHEVARRÍA

Loraldiaren lehenengo asteari buruzko balorazio orokorra egin zuten astelehenean festibalaren arduradunek. Adierazi zutenaren arabera, ikusle kopurua handia izan da eta ia ekitaldi guztietan sarrerak agortu dira. «Bigarren asteari begira erronka handiak ditugu begi bistan, estreinaldiak eta ikuskari bakar eta berezi batzuekin», azpimarratu zuten antolatzaileek.

Egia da. Bigarren asteko proposamenak berriro ere mota askotarikoak izango dira, literatura, musika eta dantza arloko ikuskariekin. Erabateko estreinaldiak eta ikuskizun bakar eta bereziak eskainiko ditu Loraldiak. Literaturaren inguruko aurkezpen batekin hasi da aste honetako programazioa. Izan ere, atzo Ekaitz Goienetxeak Zaldi mamarroa nobela aurkeztu zuen publiko aurrean Bilboko Elkar liburudendan.

Musikara salto egingo du gaur jaialdiak. Interesdunek Ruper Ordorikaren unibertsora hurbilduko dira, beste behin ere, ekarpen berrien bitartez, euskal musikagintzan izarrak diren beste egile batzuen eta Bernardo Atxaga eta Fermin Etxegoienen eskutik. Dabilen harriari so, azukre koxkorrak Ruper Ordorikarentzat ikuskizuna Kafe Antzokian ospatuko da gaueko bederatzietan.

Bihar, berriz, Hiru Emakume Arriaga Antzokiko produkzioaren estreinaldia izango dugu eta asteburuari bi proposamenekin emango zaio hasiera. Isturitzetik Etiopian barrena ikuskariak modu berritzailean literatura, musika eta ikus-entzunezkoak bilduko ditu. Horren oinarrian literatura arloko Artze eta Atxaga izen handien lanak izango ditugu.

Dastaketa musikatua

Gure kulturan hain garrantzitsua den gastronomiak garrantzia izango du ere Loraldia jaialdian. 'Baigorritik Carcarrera. Euskal Herriko ardoetan zehar bidaia bat' ardo dastaketa musikatuaren bitartez interesdunek bost ardo dastatuko dituzte ostiralean, mokadu txiki batekin lagunduta. Ardo bidaia hau Jon Martinezek, Ardoonak egitasmoaren lemazainak, gidatuko du. Bidaide Maria Arriaga musikaria izango du eta kantuen bidez mahatsaren zukuaren unibertsoan zehar ibiliko dira parte hartzaileek.

Larunbatean dantza proposamenei bereziki eskainitako asteburuan murgiltzeko aukera izango da, Sagartu, Hika teatroa eta Oinkari dantza taldearen lana, lehenengoz antzoki batean egingo dela.

Eta igandean, beste dantza bi ikuskizun: goizean eta hiru emanalditan, bereziki Kukaik Loraldirako sortutako Oteizak 110 ikuskaria eskainiko du. Antzespena Euskalduna Jauregiko espazio eta ikusleekin lotura bilatuko du. Eta iluntzean, Mikel Laboaren maisuaren lanean oinarritutako Lekeitioak ikuskaria estreinatuko du Mizel Theret dantzariak. Argi dago, beraz, Loraldia Festibalak aukera anitz eskainiko dizkiela interesdunei. Ez ezazu pentsa eta anima zaitez.

Contenido Patrocinado

Fotos

Vídeos