Errenteriako Landarbaso Abesbatzak irabazi du Asiako Choral Grand Prix txapelketa

Errenteriako Landarbaso Abesbatzak Balin izan den Asia Choral Grand Prix lehiaketa irabazi du, orain arte lortu duen saririk garrantsitzuena. Lehiaketa horretan parte hartu duen Europako lehenengo abesbatza izan da, eta bere estreinaldian sari nagusia lortu du.

Abesbatzako berrogei lagunak larunbatean abiatu ziren Balira. Finalean bost pieza interpretatu behar izan zuten hogei minutuko tartean. Lan horien artean, Jesus Guridiren 'Akerra ikusi degu' eta Javier Bustoren 'Ametsetan' zeuden.

Finalaren mekanika hurrengo izan zen: hogei minutu dauzka talde bakoitzak bost obra kantatzeko. Kronometroa aurrera doa, eta ez da gelditzen bostak kantatu arte. Abesti aldaketak ere hogei minutu horien barruan egin behar dira. Jendeak ezin du txalorik ere egin, eta, luzatzen badira, zigortzen dituzte.

Filipinetako bi abesbatzaz gain, Malaysiako koru bat, Indonesiako koru bat eta Taiwaneko beste bat izan ditu aurkari Iñaki Tolaretxipik zuzendutako talde gipuzkoarrak. Finala Baliko Giri Nata Mandala aretoan jokatu da, abesbatzak berak esan duenez, koru kanturako akustika zaila duen areto bat da. «Eszenatokiaren tamaina handia dela eta, zailtasunik handienetako bat musika publikoarengana eta, bereziki, nazioarteko epaimahaiarengana iristea izan da. Soinuaren potentzia eta kalitatea, ziur aski, faktore erabakigarriak izan dira garaipenerako». Asiako Grand Prix finalera beste hainbat lehiaketatan garaile ateratako abesbatzak igarotzen dira, eta 2019an Balin bertan egindako txapelketa irabazi ondoren pasatu zen finalera.

• Temas
• Errenteria
• Gipuzkoa