https://static.elcorreo.com/www/menu/img/zurekin-desktop.jpg

Enpresa-ideia bat garatzeko mila euroko laguntza eskainiko du Arrigorriagak

Negozio berri bat martxan jartzeko, berriz, 1.500 euroko laguntza eskainiko du herrialdeko Udalak

ELCORREO.COM

Lan-merkatuaren egoera zaila da oraindik ere eta batzuetan irtenbidea autoenplegua izan daiteke. Hala eta guztiz ere, bidea korapilatsuegia izaten da askotan, eta une horietan bultzadatxo bat erabakigarria izan daiteke. Ideia horretan oinarrituta, Arrigorriagako Udalak, Lanbideren laguntza ekonomikoarekin, hainbat diru-laguntza emango ditu: alde batetik, enpresa-ideia bat garatu eta aztertzeko laguntza eskainiko die dagoeneko negozio-ideia bat daukaten ekintzaileei; bestetik, enpresa-jarduera berriak abian jartzeko laguntzak emango dizkie dagoeneko enpresa edo negozio berri bat hasteko bideragarritasun plan bat esku artean duten ekintzaileei.

Urtero egon ohi duen bezala, Arrigorriagako Udalak hitzarmen bat sinatu du Lanbide –Euskal Enplegu Zerbitzuarekin, ekintzaileei enpresa-ideia garatzean aholkuak eman eta tutoretza gauzatzeko. Parte hartzen dutenei zuzeneko diru-laguntza emango zaie: sustatzaile bakoitzak 1.000 euroko laguntza eskuratuko du; enpresa-ekimen berriak martxan jartzeko, aldiz, gutxienez 1.500 euro jasoko dituen bitartean. Kopuru horiek %15 handituko dira eskatzailea 18 urtetik gorakoa eta 30 urtetik beherakoa bada akonpainamendua-prozesua hasten den unean, eta beste %15 handituko dira ekintzailea emakumea izanez gero.

Diru-laguntza guztira 11.800 eurokoa da, eta sei proiektu tutorizatu nahi dira: ideia garatzeko bi proiektu (3 hileko tutorizazioa izango dute) eta abiarazteko 4 proiektu. Azken horiek ere 3 hileko tutorizazioa izango dute eta hurrengo 3 hiletan Ekonomia Jardueren gaineko Zergan alta emango zaie.

Eskabideak aurkezteko epea dagoeneko zabalik dago eta otsailaren 22an amaituko da. Arrigorriagan edo Arratia-Nerbioi eskualdean enpresa-ideia bat ezarri nahi duen eta Lanbiden izena eman duen edozein langabe aurkez daiteke. Eskaera guztien artean Lanbidek baimentzen dituen adina proiektu hautatuko dira, babes ekonomiko jaso dezaten.

Eskaera egiteko beharrezkoa den inprimakia eta deialdiari buruzko informazio osoa eskuratzeko jo ezazu Udaleko Enplegu Zerbitzura. Enplegu Zerbitzuarekin harremanetan jartzeko deitu 944 020 208 telefono zenbakira edo bidali mezu bat helbide elektroniko honetara:enplegua@arrigorriaga.eus

Gogoratu behar dugu Lanbidek ematen dituen diru-laguntzak gorabehera, Udaleko Enplegu eta Ekonomiaren Sustapenerako Sailak ekintzaileentzako laguntza ematen jarraitzen duela enpresa-ekimen berriak martxan jartzeko beharrezko informazioa eta aholkuak doan eskainiz.

Temas

Euskera

Contenido Patrocinado

Fotos

Vídeos