Enplegu Foroa egingo da bihar, Bizkaia Aretoan

Enplegu Foroa ospatuko da ostegunean, otsailaren 21ean, lehenengo aldiz Euskal Herriko Unibertsitateko (EHU) Bizkaiko campuseko Bilboko Bizkaia Aretoan. EHUk antolatutako enplegu foroetatik bigarrena izango da hau, pasa den ostegunean egin baitzen Araban lehena, Gasteizko Udalarekin elkarlanean. Hirugarrena, bestalde, datorren asteko ostegunean, otsailaren 28an, izango da, Gipuzkoako campusean, EHUk jakinarazi duenez.

Foroen helburua da EHUko ikasleen eta tituludunen enplegagarritasuna hobetzea eta gazte horien eta profil jakinen bila dabiltzan enpresen arteko harremanak ahalbidetzea. Era berean, ikasleentzako, enpresentzako eta instruktoreentzako formakuntza eta aurkezpen saioak antolatu dira eta, antolatzaileek jakinarazi dutenez, foro hauen antolaketan Lanbidek lagundu du.

Bizkaiko campuseko Enplegu Foroan 47 enpresak eta hiru erakunde publikok hartuko dute parte eta 204 lan eskaintza egongo dira. Horrez gain, 46 stand izango dira eta bi motako jarduerak egingo dira: batetik, 40 enpresaren aurkezpenak, eta, bestetik, enpresek aukera izango dute aldez aurretik aukeratu dituzten parte hartzaileekin harremanetan jartzeko.

Programari ongietorria emateko ekitaldi batekin hasiko da. Bertan Txelo Ruiz Ikasleen eta Enplegagarritasunaren errektoreorde eta Patxi Juaristi Bizkaiko campuseko errektoreordea hitzaldia eskainiko dute. Geroago, 10:00etan, enpresen aurkezpenak eta enpresen eta hautagaien arteko lehen harremana izango dira. Eta arratsaldean, 16:00etatik aurrera, talde ezberdinek saioak egingo dituzte.

• Temas
• UPV
• euskera