https://static.elcorreo.com/www/menu/img/zurekin-desktop.jpg

Emakume Pilotarien Elkartea jaio da, emakumeen pilota-mundua arautu eta sustatzeko asmoz

Patri Espinar eta Olatz Arrizabalaga./José María López
Patri Espinar eta Olatz Arrizabalaga. / José María López

Elkargora 80 pilotari inguru atxiki dira, pilotari eta pala-jokalariak gehienbat

UNAI SARRIUGARTE

Emakume Pilotarien Elkartea jaio da, emakumeen pilota mundua arautu eta sustatzeko asmoz. Elkartea hainbat modalitateko 80 pilotari inguruk sortu dute, pilotari eta pala-jokalariak gehienbat. Edonola ere, ahal bezain laster zesta-jokalariak eta beste zenbait modalitateetako pilotariak elkartera atxikitzea nahi dute, emakumezkoen pilota maila guztietara helduz. Elkartearen aurkezpen ekitaldia pasa den larunbatean, ekainak 29, ospatu zuten Azkoitiko Oteiza Pilotalekuan.

Azken boladan emakumezkoen pilotak urte oparoak bizi izan du. Hori dela bide, Emakume Pilotarien Elkartea sortzea erabaki dute (EPE). Elkarte berri honen sorreran Euskal Herriko Pilota Federazioak, Eusko Kaurlaritzak, Avento kirol aholkularitza bulegoak, Azkoitiako Udalak, Nafarroako Gobernuak eta Emakumendek hartu dute esku.

Elkarteko kide eta pilotariak diren Patri Espinar eta Maider Mendizabalek pasa den larunbatean egindako prentsaurrekoan emakumezkoen pilota-munduaren nondik-norakoen inguruan mintzatu ziren. Euren esanetan: «Zeresan handia dugu, baina esateko aukera gutxi. Emakume pilotariok kantxetan protagonistak izan arren, ikuskizunaren parte baino ez gara».

Elkarteko bi kide hauek emakumeen aktibitatea jokora soilik murrizten dela nabarmendu zuten. Hori dela medio, egun emakumezkoen pilotak duen egituraketa ahulari aurre egin nahi diote elkargo sendo bat sortuz, Euskal Herrian pilotan jokatzen duten eta jokatu nahi duten edonori eskua luzatuz.

Elkarte berri honen bitartez aurrerantzean hainbat udalerritan ekimenak eta egitasmo bereziak antolatuko dituztela aurreratu dute Espinar eta Mendizabalek. Izan ere, emakumezko pilotarien baldintza duinak sustatzeko nahi dituzte. Gainera, pilota federazio ezberdinekin eta pilota bultzatzen duten erakunde pribatu eta publikoekin harremanetan jarri nahi dute akordio eta hitzarmen ezberdinak aurrera eramateko helburuarekin.

Temas

Euskera