https://static.elcorreo.com/www/menu/img/zurekin-desktop.jpg

Ekintza ugari Gorbeiako parke naturalaren 25. urteurrena ospatzeko

Zaldi bat Gorbeiako tontorrean./Fotolia
Zaldi bat Gorbeiako tontorrean. / Fotolia

Lehen ekintza igande honetan izango da, eta Gorbeia mendiaren tontorreraino igoko dira

PAUL PICADO

Gorbeiako parte naturalak 25 urte bete ditu, eta ospatzeko ekintza berezi batzuk antolatu dira. Parte hartu nahi?

Igande honetan lehen ekintza prestatu dute: Gorbeia mendiaren tontorreraino igotzea. Horrez gain, ekainaren 21ean, ostiralean, beste zenbait jarduera ere antolatu dituzte, besteak beste, antzezlan bat eta larre loretsuen lehiaketa. Larre horiek, erein gabeko larreak dira, baina lore espezieetan eta polinizaziorako garrantzitsuak diren intsektuetan aberatsak.

Larre horietako belarra moztu eta animaliei emango diete, jan dezaten. Beraz, lehiaketa horretan, larreak hain zuzen ere moztuko dituzte. Epaimahaiak baloratuko dituen arloen artean hauek izango dira: bazkaren ezaugarriak, lurzatiak abereek erabiltzeko moduan kudeatzen diren ala ez, askotariko loreak izatea edo intsektu polinizatzaile ugari egotea.

Igandeko mendirako igoera 09.15ean hasiko da, bi hegaletan, hots, Zaraten eta Saldropon. Gurutzera gutxi gorabehera 12.30ean heltzea espero dute, eta han, hamaiketakoa banatuko zaie mendizaleei. Gero, Arabatik abiatu direnak Bizkaiko ibilbidetik jaistea, eta Bizkaitik abiatu direnak Arabatik jaistea proposatu dute, eta horretarako autobus-zerbitzua egongo da.

Parke Naturalaren 25. urteurrena ekainaren 21ean beteko da. Eta esandakoak ez dira antolatu diren ekintza bakarrak. Haurrentzako antzezlana, hitzaldi etnografikoa, animaziozko bideo dokumentala eta oraindik jakinarazi ez dituzten beste jarduera batzuk ere egongo dira. Bestalde, 2044. urtera arte berriro irekiko ez duten denboraren kapsula bat ere lurperatuko dute. Bertan, Gorbeiako objektu eta elementu esanguratsuak sartuko dituzte.