https://static.elcorreo.com/www/menu/img/zurekin-desktop.jpg

EHUko Bizkaia Student Formula auto berria Silverstonen lehiatzen ari da

EHUko Bizkaia Student Formula auto berria Silverstonen lehiatzen ari da

Ikasleek hilabete asko behar izan dituzte 200.000 euroko aurrekontua duen eserleku bakarreko ibilgailua diseinatu eta egiteko

ELCORREO.COM

Bizkaia Student Formula autoa Silverstonen lehiatzen hasi da. Euskal Herriko Unibertsitateko (EHU) Bilboko Ingeniaritza Eskola hamargarren aldiz hurbildu da Ingalaterrako zirkuitora, eta, gaurtik igandera arte, bertan ospatzen den nazioarteko lehiaketan parte hartuko du. Student Formularen helburua berrikuntza eta talentua bultzatzea da, eta euskal ikasleek sortutako autoak hainbat herrialdetako unibertsitateetako 100 talde izango ditu aurrez aurre.

Baina hori ez da guztia. EHUk jakinarazi duenez, Ingalaterrako Silverstonen lehiatu ondoren, EHUko Bilboko Ingeniaritza Eskolako ikasleak Kataluniako Montmelon izango dira abuztuan, hilaren 23tik 26ra, munduko hainbat unibertsitatek egindako beste auto askorekin batera.

Bizkaia Student Formularen 2018ko autoa elektrikoa da. Karbono zuntzezko kroskobakarreko txasisa eta 3 metroko luzera, 1,5 metroko zabalera, 1,2ko altuera eta 230 kiloko pisua ditu. Bere binakako motorrak 80 kilowatteko potentzia du, hau da, 110 zaldiren baliokidea, eta puntako abiaduran 110 km/h-ra heltzen da, 0tik 100era hiru segundotan azeleratzea lortuz. Gainera, bere bateriek 22 kilometrotako autonomia eskaintzen dute potentzia gorenean.

Ikasleek hilabete asko behar izan dituzte 200.000 euroko aurrekontua duen eserleku bakarreko ibilgailua diseinatu eta egiteko. Prototipo berria egiteko autoaren oinarrizko hiru aldeak berriro diseinatu dituzte: txasisa eta aerodinamika aldatu dira eta lehenengo aldiz batera diseinatu dira. Horri esker, aire fluxua errazagoa da, hozte sistema hobetu egingo da, eta bihurguneetan autoaren oratze maila handitzea lortuko da. Bestalde, trakzio sistemaren diseinua erabat berritu da bolumena gutxitzeko eta, horri esker, pisua arintzeaz gain, pilotuarentzat espazio gehiago eta ergonomia hobea lortu dira.

Helburua, estatu mailako talderik onena izatea

Silverstoneko nazioarteko lehiaketari begira helburua da, batetik, lehenengo 20en artean sailkatzea eta, bestetik, Bussiness Case proban lortu zen lehenengo postuari eustea. Bigarren helburua garrantzitsua da, ikasleek garatu duten eta proiekzio komertzial handiena duen prototipoa izan zelako, munduan hedapen handiena duen UK Silverstoneren nazioarteko lehiaketan.

Halaber, Montmelon helburua izango da Estatu mailako talderik onena izatea, sailkapen orokorrean lehenengo laurdenean geratzeaz gain. 2014an, 2015ean eta 2016an Estatu mailako lehenengo taldearen saria jaso zuten, eta ibilgailurik eraginkorrarena Montmeloko lehiaketan.

EHUko Bilboko Ingeniaritza Eskolak hamar urte baino gehiago daramatza diziplina anitzeko hezkuntza proiektu honekin. Bere helburua ikasleen berrikuntzarako eta asmakizunetarako gaitasunak lantzea da, eta, aldi berean, prestakuntza hobetzea zein etorkizunean lana lortzeko aukerak handitzea. Hori guztia proiektuetan oinarritutako metodologia berritzailearen bidez.

Orain arte, 500 ikasle inguruk izan dute taldean parte hartzeko aukera: urtero auto bat diseinatzeko, eraikitzeko eta balioztatzeko erronkari eusten dio, eta munduko unibertsitateen arteko txapelketa garrantzitsuetan lehiatzen da.

Temas

Euskera

Contenido Patrocinado

Fotos

Vídeos