https://static.elcorreo.com/www/menu/img/zurekin-desktop.jpg

EHSF-k nazioarteko ofizialtasuna eskatu dio Nazioarteko Surf Elkarteari

Aritz Aranburu, Mundakan./Efe
Aritz Aranburu, Mundakan. / Efe

Euskal Herriko Surf Federazioa 1990eko martxoan Kirol Elkarte eta Federakundeen Erregistroan sartu zen, 2005. urtean Espainiako Surf Federazioa (FES) Europako Federazioko kide bilakatu zen arte. Jaurlaritzak bere «babes osoa» eskaini dio aldarrikapenari, euskal surfak historikoki izan duen nazioarteko bokazioaz jakitun

AMALIA IBARGUTXI

1989ko azaroan adostu zuten Euskal Herriko Surf Federazioa (EHSF) sortzea, eta 1990eko martxoan Kirol Elkarte eta Federakundeen Erregistroan sartu zen, 2005. urtean Espainiako Surf Federazioa (FES) Europako Federazioko kide bilakatu zen arte. Orain, EHSFren eta Eusko Jaurlaritzaren ustez, arautegi eta lege mailako baldintzak betetzen dira nazioarteko ordezkaritza ofiziala berreskuratzeko, eta eskakizun ofiziala egin dute Nazioarteko Surf Elkarteko-International Surfing Association (ISA) kide izateko.

EHSFren ordezkariak ISAk La Jollan (Kalifornia) duen egoitzan egon dira nazioartean aitortza ofiziala izateko eskari formala egiteko. Maialen Saez, Euskal Herriko Surf Federazioko presidenteorde eta Gipuzkoako Surf Federazioako presidentea, eta, baita ere, Esther Castiñeria izan dira EHSFren ordezkariak bidai honetan. Haiekin izan da, baita ere, Jorge Fernandez, Eusko Jaurlaritzaren AEBetako ordezkaria. Adierazi dutenez, «izapide historikoa da eta aldeko ebazpena lortuz gero, euskal selekzioa bere ordezkaritza propioarekin lehiatuko litzateke ISAk antolatzen dituen mundu mailako txapelketetan».

EHSFk 1990. urtean Europako Federazioan zuen nazioarteko posizioa berreskuratzeko lehen pauso bezala aurkeztu dute bidaia. «Hamabost urtez mantendu genuen izaera ofizial hori, harik eta 2005. urtean Espainiako Surf Federazioa Europako Federazioko kide bilakatu zen arte. Orain, nazioarteko ordezkaritza ofiziala berreskuratu dezakegu», adierazi du Maialen Saezek. EHSFk idatzi bat bidali dio Espainiako Surf Federazioari, ekimen honen berri emanez.

Eusko Jaurlaritzak AEBetan duen ordezkariak esan du, halaber, eskaria aurkeztu ondoren «hitz egiteko epe bat irekitzea espero dela, elkarren arteko lankidetza eta bizikidetza lortu ahal izateko nazioartean». Euskal surfak historikoki izan duen nazioarteko bokazioaz jakitun, Jaurlaritzak bere «babes osoa» eskaini dio aldarrikapenari.

David Salinas-Armendariz legelariaren aholkularitza izan du EHSFk, eskaria berme guztiekin aurkezteko. Jon Redondo Jaurlaritzako Jarduera Fisikoaren eta Kirolaren zuzendaria ere itxaropentsu agertu da. «Gure federazioen eta, bere kasuan, gure selekzioen nazioarteko aitortza ofiziala posible da zenbait kiroletan. Surfa horietako bat da –nabarmendu du-, ISAk Euskadiren ezaugarri berdintsuak dituzten lurralde askotako federazioak onartu baititu. Halaber, gure herrian surfaren inguruan dagoen tradizio itzela aintzat hartu beharra dago. Eskariak baiezko ebazpena izatea espero dugu, baina horrela ez bada, ekin eta ekin jarraituko dugu». Euskal ordezkaritzak txosten juridiko bat, eskaria bera eta surfak Euskadin duen pisua erakusten duen ikus-entzunezko lan bat entregatu die ISAren ordezkariei.

Eskariaren ebazpena datozen hilabeteotan zehaztuko da surf federazioarentzat «kirol eta kultura izaerako aldarrikapen bat» dena. «Xedea da surflari profesionalak babestea eta sustatzea, bai eta munduko txapelketetan euskal selekzioa defendatzeko aukera ematea ere», adierazi dute.

 

Fotos

Vídeos