https://static.elcorreo.com/www/menu/img/zurekin-desktop.jpg

Egon Soda eta Pájaro 1 Pájaro 2 taldeen boloa izango da ostiralean Hell Doradon

Egon Soda taldea./
Egon Soda taldea.

Kontzertua 23.00etan hasiko da, baina ateak 22.00etatik aurrera zabalik egongo dira

PAUL PICADO

Ostiral honetan bi kontzertu izango dira Hell Doradon: alde batetik, Egon Soda talde bartzelonarra arituko da, eta bestetik, Pájaro 1 Pájaro 2 talde gasteiztarra. Kontzertua 23.00etan hasiko da, baina aretoko ateak 22:00etatik aurrera zabalik egongo dira. Sarrerak Interneten (16,50 €, kudeaketa-gastuak barne hartuta) edo leihatilan (18 €) eros daitezke. Bazkideentzako prezioa 13 € izango da.

Egon Soda taldea Bartzelonan sortu zen 2006. urtean, eta gaztelaniaz abesten duen pop-rock indie taldea da. Kideak talde desberdinetatik zetozen eta bakoitzak bere estiloa ekarri zuen. Sortu eta bi urtera lehen lana kaleratu zuten, 'Egon Soda' izenekoa. Lan horrekin, Espainiako diskorik onenen zerrendako lehena izatea lortu zuen IndieSpot zerrendan.

Bigarren lana ateratzea kostatu zitzaien, bost urte hain zuzen ere, eta horrekin arrakasta ere izan zuten. Harrezkero beste bi lan kaleratu dituzte, azkena iaz, 'El Rojo y El Negro' izenekoa. Ostiraleko kontzertuan azken lan horren abestiak batik bat entzuteko aukera egongo da, baina aurreko lanetan arrakasta izan zuten abestietako batzuk ere berreskuratuko dituzte.

Bestalde, Pájaro 1 Pájaro 2 berriki sortu den talde gasteiztarra dugu, izan ere, lehen lana 2013. urtean kaleratu zuten. Bigarren lana luzaroan ibili dira prestatzen, 2015eko urrian konposaketa lanak egiten hasi baina 2017ko martxora arte ez zirelako grabatzen hasi. Estiloari dagokionez, taldeko kideek diotenez, popa, rock amerikarra eta elektronika bateratzen dituzte. Diskoa Bartzelonan grabatu dute.

Temas

Euskera