https://static.elcorreo.com/www/menu/img/zurekin-desktop.jpg

Dorian, Miss Cafeina, Depedro eta Coti musika taldeak, Getxo Sound Fest jaialdiaren kartel-buru

Dorian, Miss Cafeina, Depedro eta Coti musika taldeak, Getxo Sound Fest jaialdiaren kartel-buru

Aurtengo edizioa irailaren 19tik 29ra bitartean ospatuko da

UNAI SARRIUGARTE

Getxo Sound Fest musika jaialdiak hainbat talde ospetsuren esku hartzea izango du aurten. Bertan Dorian, Miss Cafeina, Depedro edota Coti musika taldeak ibiliko dira oholtza gainean. Aurtengo festibalaren edizioa irailaren 19tik 29ra bitartean ospatuko da. Eta kontzertuak, doako musika emanaldiekin, haurrentzako jarduerekin eta esperientzia turistikoekin uztartuko dira, adin guztietako jendearen gozagarri izan daitezen.

Esan bezala, lau izango dira aurtengo jaialdiaren kartel-buruak. Gauzak horrela, interesdunek Dorian Bartzelonako taldearen musika elektronikoaz, Miss Cafeina madrildar rock-indie laukoteaz, Depedro izenarekin ezaguna den Jairo Zavala madrildar kantautoreaz, eta, azkenik, Coti argentinar bakarlariaren 'Nada de esto fue un error' edota 'Antes que ver el sol' abestiez gozatzeko aukera izango dute.

Eskaintza musikala Bizkaiko zenbait talde lokalek osatuko dute. Debajo del Paraguas bilbotar pop-rock musika taldea edota Maria Blanco abeslariak zuzendutako Mabu bilbotar pop-rock musika taldea, esaterako. Gainera, festibalean berriro ere Fakeband getxoztar taldea ikusteko aukera izango dute bisitariek. Horrek bandaren itzulera agertokietara suposatuko du.

Jaialdiak lehendabiziko aldiz DJ ezberdinen musika fusio eta proiekzioak eskainiko ditu. Era berean, industria musikalean lan egiten duen jendeak Getxo Music Pro ekimenean parte hartu ahal izango du. Hori euskal eta espainiar musika sektoreko langileei bideratutako topaketa da.

Bestalde, festibalaren aurreko astean Preweek izeneko egitasmoa ospatuko dute, Getxoko udalerriko banda lokalek eskainitako musika zikloa. Bertan sei musika taldek hartuko dute parte: Piper's Irish Pub, Txinuk, El Comercio, Gato Pardo, Fangaloka Style eta Silvers's Tavern.

Pasa den urteko edizioan bezala, aurten ere Las Arenaseko hirigunean 3.000 pertsonentzako lekua aurkezten duen 4.000 metro karratuko esparru bat ahalbidetuko dute. Bertan dimentsio ikaragarrietako agertoki bat prestatuko dute, eguraldi txarra izanez gero jaialdia aurrera eraman ahal izateko helburuarekin.

Jaialdirako sarrerak jada eskuragarri daude Getxo Sound Festen web ofizialean eta Wegow sarreren salmenta kanalaren bitartez. Lehendabiziko 300 bonoak 40 eurotan salduko dira, edonola ere, kudeaketa-gastuak erantsi behar zaizkie sarrerei. Ondoren, gainontzeko sarreren prezioak gora egingo du. Datorren asteetan zehaztuko dute bono hauen prezioa.

Temas

Euskera