https://static.elcorreo.com/www/menu/img/zurekin-desktop.jpg

Diru-laguntzak emango dituzte Araban tokiko erakundeek aldaketa klimatikoaren aurkako neurriak ezar ditzaten

Langile batzuk, plaka fotovoltaikoak instalatzen./
Langile batzuk, plaka fotovoltaikoak instalatzen.

Energia berriztagarrien alde egindako ekintzak ere diruz lagunduko dira

PAUL PICADO

Diru-laguntzak banatuko dituzte Araban, udalek eta administrazio batzarrek aldaketa klimatikoaren aurkako neurriak har ditzaten eta energia berriztagarrien aldeko ekintzak eta proiektuak martxan jartzeko ere bai. Besteak beste eguzki-farolak jartzea, ibilgailu elektrikoak erostea, ibilgailu elektrikoak kargatzeko guneak edo biomasako galdara komunitarioak jartzea da helburua.

Guztira, 181.544 euro banatuko dira eguzki-energia fotovoltaikoa, minieolikoa, biomasa, geotermikoa eta minihidraulikoa bultzatzeko. Bestalde, mugikortasun elektrikoaren aldeko ekintzak ere bultzatuko dira. Ekintza horiei esker, eguzki-energiaz baliatuko dira argiteria publikorako, energia berriztagarriak erabiltzeko instalazioak eraikiko dituzte, ibilgailu elektrikoak erosiko dituzte arlo publikoan eta horiek kargatzeko guneak jarriko dituzte.

Bestalde, diotenez, energia-auditoretzak eta ordutegia programatzeko edo urrutiko kontroleko ekipamenduak diruz lagunduko dira. Horrenbestez, herriak eraginkorragoak izango dira eta energiaren fakturan eta ingurumen aztarnan aurreztu ahalko izango dute.

Iaz hogei erakunde inguruk jaso zuten laguntza eraginkortasun energetikoko proiektuetarako. Horrela, eguzki farolak jarri zituzten argiteria publikoan Zalduondo edo Kanpezuko udalek, edo Anda, Arroiabe, Sarria eta Maturanako administrazio batzarrek. Bestalde, Iruña Oka, Okondo edo Laudioko udalek hainbat ibilgailu elektriko erosi zituzten. Azkenik, Antoñanako administrazio batzarrak ibilgailu eta bizikleta elektrikoak kargatzeko gune bat jarri zuen.

Temas

Euskera