Chadwick Bosemanek haur eta helduak inspiratu zituen lau ekintza hauekin

Chadwick Boseman aktorearen heriotza goiztiarrak zinemako pantailetatik haratago doan arrastoa utzi du. Boseman abuztuaren 28an hil zen, aurreko ostiralean, 43 urte zituela, minbiziaren biktima. Aktorea mundu osoan ezaguna egin zen 2018an, Black Panther-en ('Pantera Beltza') egin zuen lan nagusiagatik. Aktore beltza ugarik parte hartu zuten super-heroien filma da, eta zinemagintzako mugarritzat dute adituek.

Boseman-en heriotzak mezu eta tributu ugari sortu zituen, bere ondarearen berri eman dutenak. Hori horrela, 'Wakandako erregea' honako ekintzetatik gogoratuko dute hainbatek:

Black Panther 2018an estreinatu zen, eta data horretara arte inoiz ez zen gertatu heroi nagusia aktore beltz batek interpretatzea. Bosemanek T'Challa erregea interpretatu zuen, Wakandaren burua dena, filma egiten den Afrikako fikziozko herrialdekoa, hain zuzen.

Bosemanen protagonismoa nabarmena izan zen aniztasun faltagatik kritikatzen den industria batean. 2014. urtean, azterlan batek historiako 100 film arrakastatsuenak aztertu zituen Estatu Batuetan, eta erakutsi zuen horietatik 8k bakarrik zutela protagonista ez-zuri bat. «Aktoreak ohartu gara industrian jendea dirua jartzen hasi dela gu protagonista, zuzendari edo produktoreak garen filmetan», esan zuen filmaren estreinaldian Bosemanek.

Black Panther komiki batean oinarritutako lehen filma izan zen Oscar sarietan film onenaren izendapena lortu zuena. Orotara, sei izendapen izan zituen filmak, eta hauek irabazi zituen: Soinu-bandarik onena, Jantzien diseinurik onena eta Ekoizpenaren Diseinurik onena.

Kritikoek zein zaleek txalotu zuten zinta, eta 1.000 milioi euro baino gehiago bildu zituen mundu osoan. Lupita Nyong'o aktore kenyarrak, Nakia pertsonaia antzezten duenak, filmaren garrantzia nabarmendu zuen bere garaian zinematik haratago. «Emakumeak eta gizonak boterean ikusi daitezke pelikulan, eta beren nazioaren etorkizunarekiko aldea oso modu eredugarrian markatzen dute», azpimarratu zuen estreinaldian aktoreak.

Boseman Howard Unibertsitateko Arte Eskolatik graduatu zen, Washington D.C.n. 2018an, eskola berera itzuli zen, graduazio-ekitaldian hitzaldia emateko. Aktoreak gazteak motibatu zituen helburu bat aurkitzeko, ez lan bat bakarrik. Unibertsitatean emandako hitzaldia asko hedatu zen eta diskurtsoa filmaren mezuarekin bat egitea lortu zuen aktoreak.

«Helburuak diziplinak gurutzatzen ditu. Helburua funtsezko elementua da bakoitzarentzat. Horregatik gaude planetan historiaren une berezi honetan«, esan zuen Bosemanek. «Orain duzu garaia. Ekintza berrien argiak piztuko zaituzte gaur. Bideari ekitean, jarraitu harro eta asmo onez».

Bai bizitzan, bai hil ondoren, jende askok onartu zuen Bosemanen irudiak izan zuen garrantzia. Aktorearen heriotzaren berri izan ondoren, Kamala Harris senatariak esaterako, Joe Bidenekin batera lehendakariorde izan daitekeen hautagaiak, argazki bat argitaratu zuen bere Twitterrean, aktorearekin batera.

«Chadwick Boseman bikaina, atsegina, kultua eta xumea izan zen», idatzi zuen Harrisek txioan. «Oso goiz joan zen, baina bere bizitza desberdina izan zen erabat».

Barack Obamak ere Bosemanen lana nabarmendu zuen, eta gogora ekarri zuen aktorea Etxe Zurira joan zela, haur talde batekin egoteko. «Berehala ikus dezakezu bedeinkatuta zegoela», idatzi zuen Obamak bere kontuan. «Gaztea, adimentsua eta beltza izatea; indar hori erabiltzea haurrei heroiak emateko eta hori guztia minaren erdian egitea. Eraginkor bihurtu zituen haren urteak».