https://static.elcorreo.com/www/menu/img/zurekin-desktop.jpg

CEBEK Bizkaiko Enpresarien Konfederazioak derrigorrezko lanaldiaren erregistrorako denbora gehiago eskatu du

Pedro Campo, Cecobiko presidentea; eta Inaki Garcinuño eta Francisco Javier Azpiazu, Cebekeko presidente eta idazkari nagusiak, astearteko prentsaurrekoan. /
Pedro Campo, Cecobiko presidentea; eta Inaki Garcinuño eta Francisco Javier Azpiazu, Cebekeko presidente eta idazkari nagusiak, astearteko prentsaurrekoan.

Euskal enpresen gehiengoa lege berriarekin galduta omen dabil

UNAI SARRIUGARTE

Azken egunotan jarri da abian Espainiar gobernuak duela egun gutxi gainditutako nahitaezko lanaldiaren erregistroa. Dinamika hau egiten dihardute egun Euskal Autonomia Erkidegoko lantoki, bulego eta zenbait denda txiki. Bertan lanera zer ordutan sartzen diren eta zer ordutan amaitzen duten zehazten dute euskarri manual edota digitalen bitartez.

Hatz marka digitala, espresuki prestatutako aplikazio informatikoak edota enpresa handiagoetan, lanaldia neurtzeko ohiko sistema, fitxatzeko makina erabiltzen hasi dira langileak. Izan ere, igandeaz geroztik dago martxan lanaldiaren erregistroaren nahitaezko legea. Espainiako gobernuak dioenez, aparteko orduak beltzean ez ordaintzea eta gehiegizko lanaldiak murriztea da lege berri honen helburua.

Bestalde, CEBEK, Bizkaiko Enpresarien Konfederazioak, Bilbon pasa den asteartean egindako agerraldian derrigorrezko lanaldiaren erregistrorako «denbora gehiago» eskatu zuen. Era berean, patronalak helerazi zuenez: «enpresak galduta eta zalantza askorekin daude».

Javier Azpiazu Cebek Bizkaiko enpresaburuen elkarteko idazkari nagusiak nabarmendu zuenez, oso zaila omen da egun lanaldia erregistratzeko era bakar bat egotea, lan egiteko modu oso ezberdinak baitaude. Hortaz, Aspiazuk lan tipologia ezberdinak erregistratzeko moduak asmatzeko denbora eskatu zuen.

Halaber, lege honek zenbait enpresei sistema hauek erabakitzeko eman zaien askatasuna salatzen dute sindikatuek, ateak zabalik ixten baitizkiete iruzurrari eta manipulazioari. LABek eskuz egindako erregistroen aurka gogor egin du. Langile prekarioenek ez dutelako benetan egindako lanaldia agerrarazteko aukerarik izango. Hori dela bide, euskal sindikatuak patronalak bere onerako manipulatu ezin dituen tresna digital eta elektronikoak eskatu ditu lanaldia zehazteko.