https://static.elcorreo.com/www/menu/img/zurekin-desktop.jpg

Bustuarialdeko Eskola Txikien jaialdia ospatu zuten atzo, Muxikan

Ume batzuk, 2015eko edizioan./Maika Salguero
Ume batzuk, 2015eko edizioan. / Maika Salguero

Eskola publikoen aldeko jai egunean eskualdeko bost ikastetxek hartu zuten parte

UNAI SARRIUGARTE

Bustuarialdeko Eskola Txikien jaialdia ospatu zuten atzo Muxikan. Mundaka, Busturia (Uzelai), Gautegiz Arteaga (Montorre), Muxika (Urretxindorra) eta Eako (Haizeder) ikastetxe publikoek bat egin zuten, ekimenaren hamabosgarren edizioan. Urterik behin eskola publikoen aldeko festaren testigua eskolarik eskola igarotzen da.

Urtero 500 ikasle eta irakasletik gora biltzen dituen jaialdiak, aurten ere, partaide izugarri izan ditu, 500 inguru. Atzokoa, aldarrikapenerako jardunaldia izan zen, izan ere, ekimenak eskola txikiek herriei ematen dieten bizia azaleratzea izan du helburu. Busturialdeko Eskola Txikien festaren antolatzaileek esan zutenaren arabera: «Herri txiki baten lehentasuna eskola herrian izatea da, herriaren etorkizuna ziurtatzen duelako».

Aurtengo jaialdia Muxikako Montorre ikastetxearen esku egon da eta eskolako ordezkariek helarazi zutenez: «herrien altxorra bertan bizi diren pertsonak dira, eta horien artean oso garrantzitsuak dira umeak». Argi daukate eskola herrian bertan izateak umeen hezkuntzan eta herriko bizitzan bizitasuna eta aberasgarritasuna dakarrela.

Parte hartzaileek goizeko hamaikak aldera ongietorria eman zioten jaialdiari. Horretarako bertan batu ziren ikasle eta irakasleek argazki erraldoia atera zuten momentu berezi hori behar bezala gordertzeko. Ondoren, 11:30ean hamaiketako ederra dastatzeko aukera izan zuten eta 12:00etan, musika emanaldiaren entsaioekin abiatu ziren.

Emanaldiak bukatu bezain pronto, Haur zein Lehen Hezkuntzako tailerrei buru belarri ekin zieten eta, 13:45ak aldera, bazkaria eta jolas libreaz gozatzeko aukera izan zuten etxeko txikienek. Eskola publikoen aldeko ekimena 15:00ak aldera amaitu zen. Gero, 15:30ak inguruan, Busturialdeko eskola ezberdinetako ikasle eta irakasleak euren ikastetxeetara bueltatatu ziren klaseekin jarraitzeko.