https://static.elcorreo.com/www/menu/img/zurekin-desktop.jpg

Bueltan da 'ElkarrizKatea', idazleen elkarrizketez gozatzeko telebista saioa

Bueltan da 'ElkarrizKatea', idazleen elkarrizketez gozatzeko telebista saioa

Booktegi webguneak eta Azkue Fundazioak lankidetza adostu dute proiektu hau babesteko

EL CORREO

Idazleen arteko elkarrizketak telebistan ikustea gustoko baduzu poztuko zara 'ElkarrizKatea' saioaren denboraldi berria heltzear dagoela jakitean. Booktegi webguneak eta Azkue Fundazioak lankidetza adostu dute proiektu hau babesteko asmoz. Izan ere, Booktegiren telesaioa da 'ElkarrizKatea', eta hainbat idazlek parte hartzen dute bertan, elkarren artean solasaldi interesgarria eskaintzeko asmoarekin.

Iaz zazpi idazlek hartu zuten parte telebista saio honetan. Hala, Azkue Fundazioko iturriek jakinarazi dutenaren arabera, aurrekoetan bezala «A idazleak B idazleari elkarrizketa egingo dio; hurrengo saioan B idazleak C idazleari, eta horrela katea osatu arte zazpi euskal idazle esanguratsuenetarikoekin». Iaz Katixa Agirre, Harkaitz Cano, Beñat Sarasola, Arantxa Urretabizkaia, Peru Iparragirre, Itxaro Borda eta Arantxa Iturbe igaro ziren saiotik.

'ElkarrizKatea' saioko lantaldea Bilbon dagoen Euskararen Etxean izan da saioaren denboraldi berriaren sarrera grabatzeko, denboraldi berriko elkarrizketak Euskararen Etxean grabatuko baitira. Sarreran, animazioan oinarritutako aulki jolas bat jaso da.

Aurten, Iban Zaldua, Uxue Alberdi, Gotzon Barandiaran, Oier Guillan, Ana Malagon, Edorta Jimenez, Laura Mintegi eta Idurre Eskisabel idazleak eseriko dira Booktegiko 'ElkarrizKatea' saioko aulkietan, Azkue Fundazioaren babesarekin. Ana Galarragak gidoiak prestatuko ditu, bai eta idazleen biografiak aurkeztu ere.

Azkue Fundazioaren helburu estrategikoetako bat euskarazko ikus-entzunezko sormena eremu digitalean sustatzea da, eta horregatik babesten du 'ElkarrizKatea' saioa.

Temas

Euskera