https://static.elcorreo.com/www/menu/img/zurekin-desktop.jpg

Bost bizkaitar ohorezko hamasei euskaltzain berrien multzoan

Andres Urrutia, Euskaltzaindiako presidentea./Luis Ángel Gómez
Andres Urrutia, Euskaltzaindiako presidentea. / Luis Ángel Gómez

Euskararen alde egindako lan nabarmenenak saritu eta ezagutarazteko, aldiro-aldiro izendatzen ditu ohorezko euskaltzainak Akademiak

AMALIA IBARGUTXI

Hamasei ohorezko euskaltzain berri izendatu ditu Euskaltzaindiak. Lanbide askotariko lagunek osatzen dute taldea, hezkuntzari, filosofiari, soziolinguistikari, bertsolaritzari, literaturgintzari, hiztegigintzari, kantagintzari, kazetaritzari, literatur ikerketari edota itzulpengintzari lotutakoak. Guztira, bost emakumezko eta hamaika gizonezko izendatu dituzte oraingoan: bost bizkaitar, sei gipuzkoar, bi lapurtar eta baxenabartar, arabar eta nafar bana. Jose Antonio Aduriz, Martxel Andrinua, Txaro Arteaga, Maria Jose Azurmendi, Miren Jone Azurza, Henri Duhau, Izaskun Gastesi, Abel Muniategi, Manex Pagola, Jose Maria Rementeria, Sabin Salaberri, Txomin Solabarrieta, Julen Urkiza, Arantxa Urretabizkaia, Pello Zabala eta Auxtin Zamora dira hautatuak.

Akademiaren arautegi jarraiki, Euskaltzaindiak aldiro-aldiro izendatzen ditu ohorezko euskaltzainak, euskararen alde egindako lan nabarmenenak saritu eta ezagutarazteko.  Ohorezko euskaltzainen azken izendapena 2014ko maiatzaren 30ean egin zen, eta orain gehitu zaizkien hamaseikoarekin, 49 dira, guztira, aitortza hau jaso duten lagunak.  

Izendapena jaso berri dutenen artean bost bizkaitar daude, denak gizonezkoak. 

Abel Muniategi Ereñon jaio zen, 1942ko irailaren 30ean. Zuzenbidean lizentziaduna da,  Deustuko Unibertsitateko irakasle eta Bizkaiko Foru Aldundiaren abokatu izatetik erretiroa hartutakoa. Bertsolaria izana, epaimahai gai jartzaile ere. Aldizkari eta egunkarietan idatzi izan du eta 'Zenbat gera' abesti ezagunaren letraren egilea da Muniategi.

Jose Maria Rementeria Ibarluzea Etxebarriko bizilaguna da, 1940ko apirilaren 23an jaiotakoa. Apaiz ikasketak Arteagako eta Derioko Seminarioetan egin zituen eta diplomaduna da Katekesian eta Teologian. 1970eko hamarkadan, Bilboko Elizbarrutiko Katekesi Idazkaritzako kide izan zen, eta azken urteetan arduraduna. Elizen arteko Bibliaren itzultzaile taldeko kidea ere izan da.

Martxel Andrinua Lariz (Ziortza-Bolibar, 1930) Bilboko Elizbarrutiaren Bizian Gora elkarteko kontseilaria izan da. Bizkaiko eta Euskal Herriko Bertsolari Txapelketetako epaile ohia, Euskaltzain urgazle izendatu zuten 1961ean.

Txomin Solabarrieta Etxaburu (Ondarroa, 1930), berriz, apaiz egin ondoren, lanean izan zen Bizkaiko hainbat parrokiatan, euskarako alfabetatze-euskalduntze eskolak sustatzen, dantza taldeak sortzen, eta euskal antzerkia bultzatzen. Euskaltzaindiko irakasle taldearekin andereñoentzako ikastaroak ematen ibili zen eta Bizkaiko elizbarrutiko itzultzaile ofiziala izan da urteetan (1978-1991). Bere ekarpen nagusia hiztegigintzan egin du. Itsas munduko lexikoa, sinonimoak aukeratzen nahiz egokitzen, eta, batez ere, Aditz Hiztegia deritzona egin ditu, besteak beste.

Julen Urkiza Txakartegik (Ondarroa, 1944), aldiz, ikertzaile gisa egindako lanengatik saritu dute batik bat. Besteak beste, Karmel aldizkaria zuzendu du 35 urtez. Olerki, Ondarroa, Arranondo, Egan, Hegats, Jakin eta Euskera aldizkarietan ere parte hartu du. Hainbat euskal idazleren lanak ere bildu, aztertu eta argitaratu ditu Karmelen, erlijiozko hainbat klasikoren lanekin batera. Ikerketa-lanak ere burutu ditu, tartean aldizkari eta egunkarietako euskal bertso eta olerkien bibliografia eta Frai Bartolome Santa Teresa idazlearen edizio kritikoa, Luis Baraiazarra ohorezko euskaltzainarekin batera.

Ohorezko euskaltzainen multzo berria lagun hauekin osatu da: Miren Jone Azurza kazetari donostiarra; Arantxa Urretabizkaia idazle eta kazetari ezagun donostiarra; Izaskun Gastesi Nafarroako ikastoletako irakasle aitzindaria; Mari Jose Azurmendi (Donostia) Filologia Erromanikoan lizentziaduna, doktorea Gizarte Psikologian eta katedraduna EHUko Psikologia Fakultatean, Beasaingo Alkartasuna Lizeoko lehen zuzendaria izandakoa; eta Txaro Arteaga (Donostia) kazetaria, besteak beste Donostiako Herri Irratian, EiTBn eta Emakunde erakundearen zuzendaritzan egin duena lan.

 

Contenido Patrocinado

Fotos

Vídeos