https://static.elcorreo.com/www/menu/img/zurekin-desktop.jpg

Borreroen aurpegia

Azken egunetako bidegabekeri eta ankerkeriaen ondorioz, gero eta gehiago dira heriotza-zigorra eta presoaldi iraunkorraren alde daudenak

Aulki elektrikoa, heriotza zigorra aurrera eramateko./Reuters
Aulki elektrikoa, heriotza zigorra aurrera eramateko. / Reuters
TXANI RODRÍGUEZ

Auschwitzen ondoren ez dago poesia idazterik, esan zuen Theodor Adornok 1951n. Baina poesia idazten jarraitu dugu gizon-emakumeok, eta eskerrak. Zoritxarrez, bidegabekeriak eta ankerkeriak egiten ere jarraitu dugu. Azken egun hauetan berriak beldurgarriak izan dira: adin handiko bi pertsona hil dituzte Otxarkoagan; Diana Quer-en gorpua agertu da; bikote batek bere seme-alabak bahituta zituela jakin dugu... Betidanik izan dugu maltzurkeria geure aurrean, baina zenbait boladek bereziki bortitz dirudite.

Horrela gauzak, gero eta gehiago dira heriotza-zigorra eta presoaldi iraunkorraren alde daudenak. Kalean, tabernetan, lagun artean, denetarik entutzen da; komunikabideetan, aldiz, presoaldi iraunkor berrikusgarrian tematu da ika-mika. Neurri hori indargabetzearen kontra daudenak sinadurak hartzen ari dira eta euren ikuspuntua zabaltzen. Ez da zaila beren arrazoiak ulertzea, ez da zaila mina irudikatzea: bihotzean gelditzen den hutsunea, suz beterik; maite zenuen horri adio esatea, eta ezin ezer egin; hiltzailea bizirik, biktima hilda. Gainera, egia da, hiltzaile askok dio desorekatuta daudela; baina piskopata asko daude eta psikopatia ez da gaixotasun bat; psikopatia betiko gaiztakeria da. Amorratzea normalena da. Baina, gauza horiek guztiak aintzat hartzen baditugu ere, ezin dugu ahaztu geure legeen helburuak berreziketa eta bergizarteratzea direla. Heriotza-zigorra eta presoaldi iraunkorra Antzinako Erregimenarekin lotuta daude; urte ilun horien ostean, Europan beste pentsamendu bat zabaldu zen, humanistagoa, liberalagoa. Azken hamarkadetan, aldiz, Frantzian, Alemanian edo Italian berreskuratu egin dira neurririk gogorrenak. Beraz, gaia eztabaidagarria da. Eta bi aldeek argudio potenteak dituzte.

Baina ni Jean Paul Sartrek esan zuen esaldi batez gogoratu naiz sarritan: Oso erraza da borreroak zein diren jakitea beldur aurpegia dutelako. Nik sinistu nahi dut heriotza-zigorra edo presoaldi iraunkor eta berrikusgarria eta aldarrikatzen dutenen aurpegietan ere beldurra dela eta ez mendekua islatzen dena.

Temas

Euskera

Contenido Patrocinado

Fotos

Vídeos