https://static.elcorreo.com/www/menu/img/zurekin-desktop.jpg

Zaindari asko ditugu, baina 'por la boca vive el pez'

Aurreko astean edo, Albert Riverak Fito Cabralesekin egindako argazki bat zabaldu zuen/
Aurreko astean edo, Albert Riverak Fito Cabralesekin egindako argazki bat zabaldu zuen
Txani Rodríguez
TXANI RODRÍGUEZ

Udak gauza on asko dakarzkigu: terrazatan primeran egoten da, errutinak eramangarriagoak dira eta alkandoren estanpatuen eremuan askatasuna erabatekoa da. Hain gaude erlaxaturik udan ezen Malumarena ez baitzaigu jasanezina iruditzen. Baina niretzat, abantaila nagusia hauxe da: eguzkiarekin, mugikorren pantailak ez dira ondo ikusten; horren ondorioz, supersumiduta eta superkonprometituta egoten jarraitzen badugu ere, epaiketa sumarisimo gutxiago igortzen ditugu. Merezi dugu atsedenaldia, urtean zehar moralaren zaindari nekaezinak izan gara. Esaterako, aurreko astean edo, Albert Riverak Fito Cabralesekin egindako argazki bat zabaldu zuen. Argazkia musikari bilbotarraren kontzertu baten ostean eginda zegoen. Fitok bereak eta bi entzun behar izan zituen, besteak beste, benetako rocker bat izateari utzi egin ziola. Egun, rocka zer den jakitea gustatuko litzaidake neri. Baina, dirudienez, rocker bat izateko ezin dira hainbat marra gorri ideologikoak gurutzatu eta, nola ez, marra horiek Instagramek eta Twitterrek markatzen ei dituzte. Egia esan, hamaika eta ehun entzuteko jaioak gara. 'Por la boca vive el pez', Fitok abesten duen moduan.

Sare sozialetan haserre bizian jartzen garen bitartean -kode etikoak errespetatzen ez direlako-, banketxe batera lan egitera joan gaitezke, edo lagun bati egindako injustizia baten aurrean, isilik geratuko gara, ez dakit. Baina horri ez diogu begiratuko. Besteen inkoherentziak dira plaza publikoan hedatu behar direnak, ez gureak.

Deskantsu bat merezi dugu guztiok; urtea nekagarria izan da. Zarata handia atera dugu sare sozialetan. Pozik egon beharko genuke. Orain, itsasertzak espero gaitu. Supersuminduta egoten jarraituko dugu, baina erosotasun handiz. Gero, arrats-gorrian, pantaila ikusgarria denean, argazkiren bat zabalduko dugu, Albert Rivera urrun, jakina. «Gure kaleetan hainbeste salbatzaile egonda, harrigarria da zelan ez gauden oraindik denetik salbaturik», dio Sonia Gonzálezek bere liburu berrian. Nik gauza bera galdetzen diot neure buruari. Zorionez, zaindari asko ditugu. Ziur Fitok ere eskertu zuela.

Temas

Euskera

Contenido Patrocinado

Fotos

Vídeos