https://static.elcorreo.com/www/menu/img/zurekin-desktop.jpg

Bizkaiko fabriken herenak produkzioa handituko du aurten

Langile batzuk, fabrika batean lan egiten./Fotolia
Langile batzuk, fabrika batean lan egiten. / Fotolia

Adituek aurreikusi dutenaren arabera, lantegien laurdenak kontratazio berriak egingo dituzte

UNAI SARRIUGARTE

Bizkaiko lantegien herenak aurten produkzioa handituko du. Zehatzago esanda, hurrengo hilabeteetan probintziako industrien %36k produkzioa eta salmentak handituko dituztela aurreikusten dute adituek. Bizkaiko enpresen %33k, berriz, salerosketen eskaera handituko dutela uste dute. Datu hauek, Bilboko Merkataritza Ganberak hurrengo hilabeteetarako egindako ikerketa baten emaitza dira.

Hortaz aparte, euskal ekonomia erritmo geldoago batean handituko da aurten. Abiadura moteltze hori gehienbat industrian pairatuko da. Eta aurreikuspenek diotenez, euskal ekonomiak %2,5 inguruko hazkuntza izango du, nahiz eta Bizkaian hazkundea txikiagoa izango den.

Europak bizi duen testuinguru ekonomikoak euskal ekonomia merkatuan eragin zuzena dauka. Gauzak horrela, irakurleak jakin beharko Frantziak eta Alemaniak industria merkatuaren geldialdi seinaleak jasan dituztela, eta Europako potentzia ekonomikoen desazelerazioak Espainiako industria gogor astindu duela. Espainiar estatuak azken bost urteotan industria arloan izan duen lehen atzerapausoa izan da.

Edonola ere, 2019. urteko lehen hiru hilabeteak aztertuta, ematen du egoerak hobera egin duela egitura industrialean. Bilboko Merkataritza Ganberak atzo euskal ekonomiaren inguran plazaratutako txostenean Bizkaiko fabrikengatik apustu sendoa egiten du. Fabriken gehiengoak produkzioa handituko duela aurreikusten du, eta Bizkaiko lantegien %5k soilik espero du salmenten jaitsiera.

Bestalde, txostenak fabrika industrialen gehiengoak bere langileria mantendu egingo duela nabarmentzen du. Era berean, enpresen laurdenak kontratazioak egingo dituztela balioztatzen da, datu itxaropentsua industria sektorearentzat. Azken hilabeteotan industriak Euskadin ahulezi joera bat erakutsi baitu.