https://static.elcorreo.com/www/menu/img/zurekin-desktop.jpg

Bilboko Udalak LGTBI fobiaren aurkako programa jarri du abian

LGTBIren desfilea iaz, Bilboko itsasadarrean./Jordi Alemany
LGTBIren desfilea iaz, Bilboko itsasadarrean. / Jordi Alemany

Kanpaina honek bihar ospatuko den Homofobiaren, Lesbofobiaren, Transfobiaren, Bifobiaren eta Intersexfobiaren kontrako Nazioarteko Egunarekin bat egingo du

UNAI SARRIUGARTE

Bilboko Udalak LGTBI fobiaren aurkako programa jarri du martxan. Bihar, maiatzaren 17an, Homofobiaren, Lesbofobiaren, Transfobiaren, Bifobiaren eta Intersexfobiaren kontrako Nazioarteko Eguna dela medio, udalak Bilbo sexu-aniztasunaren eta genero-adierazpenen alde dagoen hiria dela aldarrikatu nahi izan du.

Kanpaina honek Bilbo diskrimanaziorik eta indarkeriarik gabeko uri moduan sendotzea du helburu. Hau da, biztanleen arteko errespetu eta berdintasuna nagusitzea, eta gizartean egun normalizatua dagoen kolektibo hau aurreiritzirik gabe tratatzea.

Azken urteotan Bilboko Udalak kolektibo honen inguruko zenbait sentsibilizazio-kanpaina babestu eta egin izan ditu, berdintasuna sustatuz. Berdintasun hori dela bide, sexu-orientazioaren eta genero-adierazpenaren inguruko diskrimanaziorik ez dela onartuko aldarrikatu dute.

Egun, Bilbo balioen hiria da eta, hortaz, gayen, lesbianen, bisexualen, transexualen eta intersexualen kontrako gorrotoa gaitzesten duen lekua da. Bizkaiko hiriburuak esparru honetan aurrerapauso handiak egin dituen arren, asko dago egiteko oraindik. Izan ere, kolektibo honek askotariko diskriminazioa, irainak eta indarkeria jasaten ditu.

Egoera larri horren aurrean, udalak, gainerako erakunde eta elkarteekin, Bilbon lan egiten duten LGTBI erakundeekin eta, orokorrean, herritarrekin elkarlanean aritzeko erronka hartu du, hiriak aniztasunaren esparru bihurtzearen aldeko apustuari eusteko.

Aipatu dugunez, maiatzaren 17a LGTBI kolektiboaren aurkako Nazioarteko Eguna da. Izan ere, duela 30 bat urte Osasunaren Mundu Erakundeak homosexualitatea buruko gaixotasunen zerrendatik kendu zuen eguna izan zen.

Bestalde, Bilboko Udalak datozen egunotan zabalduko du programa hau euskarri fisiko nahiz digitaletan. Euskarri digitalei dagokienez, kanpaina ikusgai egongo da udalaren webgunean: www.bilbao.eus edota udalaren sare sozialetan: Bilbao Berdintasuna – Facebook eta Twitter- eta Bilboko Udala –Facebook, Instagram eta Twitter.