https://static.elcorreo.com/www/menu/img/zurekin-desktop.jpg

Bilboko sekretuak eta anekdotak erakutsiko dizkiguten bisita gidatuak

Bilboko sekretuak eta anekdotak erakutsiko dizkiguten bisita gidatuak

Bilbaodendakek hiriaren sekretuak ezagutaraziko ditu denda adierazgarrienetatik antolatutako 'Hemengo Shopping' bisita gidatuen edizio berrian

EL CORREO

Ba al dakizu zein den Bilboko etxebizitzarik zaharrena edo non dauden erdi aroko harresi-abarrak? Eta Bizkaiko hiriburuko lehenengo hotela non zegoen kokatuta? Seguruenik, Santiagoko Katedrala mugitzen dela ez dakizu, edo Azkuna Zentroaren zimenduen azpiko sekretuak ere ez. Gauzak horrela, enigma hauek eta bestelakoak argitzeko, Hemengo Shopping udako ibilbide gidatuen bigarren edizioa martxan jarri dute. Bilboko saltoki berezi eta adierazgarrienen bitxikeri eta anekdotak ezagutzera ematen dituen ekimena ostegunero ospatuko da arratsaldeko 6etan.

Modu honetan, uztail eta abuztuko ostegun guztietan -uztailak 25 eta abuztuak 15 jai egunak izan ezik- 18:00etatik aurrera, Bilboren bitxikeri eta historiatik bidaiatu nahi duen orok bi ibilbide izango ditu aukeratzeko. Horietako batek Santiagoko Katedrala du abiapuntu bezala eta Alde Zaharra eta honen inguruetatik ibiliko da. Besteak, aldiz, Moyua plazatik irtengo da eta Zabalgunetik ibiliko da. Bisita hauetan parte hartzeko ez da inskripziorik egin behar, elkargunean adierazitako egun eta orduan egotearekin nahikoa baita.

Hemengo Shopping ibilbideek historia, kale eta denden bitartez Bilbo erakustea dute helburu -edo ezagutzen duenari berriro erakustea-. Gainera, hiriaren bilakaera eta betiko denden arteko anekdota bilduma ederra azalduko da, merkataritza ekimen berriak albo batean utzi gabe.

Gida turistikoetan aurkitzen ez diren anekdotak

Ekimenaren antolatzaileen arabera, merkatariekin harreman zuzena izatea eta saltokien dendaosteak ikustea da bilbaoDendak elkartearen proposamena: moda eta osagarriak, janari-dendak, gourmet, izozki-dendak, etxerako osagarriak, arte eta kultura, besteen artean.

Parte hartzaileek Bilbo beste ikuspuntu batetik ezagutzeko aukera izango dute: toki, xehetasun eta produktu originalak, bertoko establezimendu askok dituzten bitxikeri, sekretu eta berezitasunekin batera. Adibidez, 'txakinartoa' zer den jakin, munduko saltsarik pikanteena non aurkitu, non ipini dizkieten markoa ehun Picasso baino gehiagori, edo zenbat almendra tona ehotu behar diren gabonetako turroi-denden eskaera hornitzeko.

Labur esanda, Hemengo Shopping ibilbideek bertoko merkataritzaren garrantzia azpimarratzea bilatzen dute, aldi berean, aisialdi alternatiba originala eskainiz bai hiritarrentzat bai udan Bilbo bisitatzen dutenentzat. Beti ezkutuan geratzen den hura ikusteko aukera eskaintzen dute, hiriko saltoki berezienen atzean geratzen dena, barrutiko historiaren inguruan gida turistikoetan normalean aurkitzen ez diren sekretu eta anekdotez gainera.

Temas

Euskera