Nor zen 'The Big O', bere errekorra Westbrookek gainditu berri duena?

Oscar Palmer Robertson, 'The Big O'. Inoizko saskibaloi jokalaririk onena izan daitekeela diote. Hori baino gehiago da. Bera saskibaloia da. 'Mr Triple Doble' ere izendatu zuten. 181 egin zituen. Lehena 1960ko urriaren 19an. 21 puntu, 10 asistentzia eta 12 erreboterekin, bere NBAko debutean. Profesional gisa egindako lehen partidan hirukoitz bikoitza egin duen bakarra da Robertson. Azkena, 1974ko martxoaren 24an izan zen, 14 puntu, 10 asistentzia eta 10 errebote erregistratu zituenean.

Ezinezkoa zirudien inoiz inork horrelako zerbait berriz lortzea Russell Westbrook agertu zen arte. Bera ere 'Mr Triple Doble' deitzen dute. Robertsonen marka berdindu berri du Westbrookek. Hau irakurtzen duzunerako, litekeena da 182a lortu izana. Izatez, bart lortu zuen bere 182. hirukitz bikoitza. Bere azken erakustaldiak ikusita, une honetan arraroa litzateke 10 puntu, errebote eta asistentzia baino gehiago egin gabe partida bat bukatzea.

Maiatzean jokatu dituen sei partidetan, bakar batean geratu da marka horren azpitik. Bederatzi errebote besterik ez zituen harrapatu Docicen Mavsen aurka. Joan den asteko lau emanaldiak antologikoak dira: igandean 33 puntu, 19 errebote eta 15 asistentzia. Ostiralean 13, 17 eta 17 izan ziren. Aurreko egunean, 29, 12 eta 17. Eta asteartean, maiatzaren 4an, Star Warsen egunean, Pacers taldeak bere 14 puntuak 21 erreboterekin eta 24 asistentziekin nola apaintzen zituen ikusi ahal izan zuen. 21 errebote antolatzailea izanda. Westbrookek 1,91 metroko altuera besterik ez du.

Westbrookek hirukoitz bikoitzeko batez bestekoa du fase erregular osoan. Berak eta Robertsonek bakarrik bukatu ahal izan dute denboraldi bat batez besteko horiekin.

Robertsonek (82 urte) izan dena baino askoz ospetsuagoa izan beharko luke. Bere talentu izugarria, Auerbach eta Bill Russellen Celticsen tiraniak eklipsatu zuen. Hamaika aldiz txapeldun, 60ko hamarkadan zortzi aldiz jarraian izan ziren garaile Bostonekoek. Hori alde batetik, bestetik Wilt Chamberlainen distira indibiduala. Erraldoi horiek aurkari zituela ere, NBAko MVP izan zen Robertson 1964an, Royals taldean jokatzen zuenean, gaur egungo Sacramento Kingsean, alegia.

Robertson 1961eko Drafteko lehena bezala sartu zen NBAn. Aurreko urtean Erroman urre olinpikoa irabazi ondoren iritsi zen ligara. Bera eta Jerry West izan ziren talde hartako kapitainak. Historiako lehenengo Dream Team-a.

Eraztuna, berriz, 1971ra arte ezin izan zuen lortu. Hamarkada batez Cincinatin lehortean bizi ondoren, Royalsetatik irten eta Milwaukeera jo zuen Lew Alcindorrekin elkartzera. Robertsonen eskutik Jabbaren jokoa beste maila batetara igo zen. Denboraldi ia bikaina burutu ondoren, finaletan 4-0 gainditu zuten Washington. «Egun horretan probatu nuen lehen aldiz xanpaina», esan zuen Robertsonek bere biografian. Irakur ezazue, aukerarik baduzue. Bere haurtzaroa, justizia sozialaren aldeko aktibismoa, NBA betiko aldatu zuen epaiketa...

Xehetasun bat gehiago antolatzaile errepikaezin honen handitasuna irudikatzeko. 1974an, Kareen Abdul Jabbar (Alcindorrek izena aldatu zuen bere lehen titulua lortu eta gutxira) eta Robertson berriro iritsi ziren finalera. Galdu egin zuten. Robertsonek erretiroa hartu zuen. Hurrengo txapelketan, 1975ean, Bucks taldea bere dibisioko talderik txarrena izan zen. Nahiz eta Jabbar oraindik taldean egon. Eta baliteke Jabbar inoiz izandako jokalaririk handiena izatea.

• Temas
• Russell Westbrook
• NBA
• Washington
• baloncesto
• Harmailatik (Sergio Eguia)
• euskera