https://static.elcorreo.com/www/menu/img/zurekin-desktop.jpg

Beldurra

Pasa den astean, Cuencako hotel batean egiten ari zen ekitaldi komertzial batetik kanporatu zuten Julia, Down sindromea duen emakume bat

Julia, bere ahizpekin./Atlas
Julia, bere ahizpekin. / Atlas
TXANI RODRÍGUEZ

Gauza askok beldurtzen gaituzte: armiarmak, alturak, jendaurrean hitz egiteak, hegan egiteak, pailazo batek, gaixotasunak, heriotzak, iluntasunak, ekaitzak, maitasuna inoiz ez aurkitzeak, maitasuna aurkitzeak, pentsioa galtzeak, Enrique Iglesiasek dakarzkigun abestiek… Eta batik bat, Michel de Montaignek azpimarratu zuen bezala, izuak berak izutzen gaitu. Izan ere, komenigarria da beldurra sentitzea, beldurrak arriskuagatik urruntzen gaituelako. Ezinbestekoa da beldurra sentitzea. Idazle askok -Pilar Adón-ek edo Enrique Vila-Matas-ek, besteak beste- adierazi dutenez, beldurra da eta ez maitasuna mundua benetan mugitzen duena.

Beraz, beldurra garrantzitsua da eta -ondo asko dakigu- librea ere bai, baina enpatia falta ez litzateke hain librea izan behar. Pasa den astean, Cuencako hotel batean egiten ari zen ekitaldi komertzial batetik kanporatu zuten Julia, Down sindromea duen emakume bat. Familiak salatu duenez, beste pertsonak beldurtzen zituela esan zioten Juliari. Salatu dutena egia bada, joera penagarri baten aurrean egongo ginateke, zalantzarik gabe. Nor beldurtu daiteke Julia bere alboan izateagatik? Haurtzaroan ikasten dugu ez dagoela munstrorik, joera higuingarriak baizik. Zoritxarrez, Down sindromea duten pertsonek egoera bidegabeak jasan behar izaten dituzte maiz. Juliarena ez da salbuespen arraro bat.

XXI. mende hau ere beldurgarria da enpatia gabeko makina bat balitz bezala jokatzen duenean. Batzuetan badirudi ez garela gai bestearen beharrak eta zirkunstantziak ikusteko. Eta hori bai dela arriskutsua. Bihozgabeko gizarte bat begi eta hanka asko dituen munstro bilakatu daiteke.

Hauxe da beldurraren definizioa: «Beldurra emozio bizia da, arriskutsutzat jotzen den berehalako estimulu edo egoera batean sentitzen dena. Muturreko egoera batean, ordea, arriskuaren pertzepzioa larria denean, izua edo beldur handia sortzen da eta subjektuaren paralizazioa gerta daiteke». Definizio hori aintzat hartuz, nik badakit nork emango lidakeen beldurra Cuencako hotel horren ekitaldi-aretoan, eta ez zen, inondik inora, Julia izango.

Temas

Euskera

Contenido Patrocinado

Fotos

Vídeos