Barria, Espejo eta Zuhatzako aterpetxeen bideoa ikusi duzu? Aukera paregabea dira naturaz gozatzeko
Arabako Gazteriaren Foru Erakundeak ikus-entzunezko bat kaleratu nahi izan du foru sareko aterpetxeen berri emateko
Zurekin
Osteguna, 9 iraila 2021, 12:50
Udako kanpaina bukatu berritan, Arabako Gazteriaren Foru Erakundeak bideo bat kaleratu nahi izan du foru sareko aterpetxeen berri emateko. Erakundeak herritarrei ezagutzera eman nahi die Barria, Espejo eta Zuhatzako aterpetxeek zer aukera eskaintzen dituzten abenturaz eta naturaz gozatzeko, 12 laguneko taldeetan.
Ana del Val Kultura eta Kirol Saileko foru diputatu eta Gazteriaren Foru Erakundeko lehendakariaren hitzetan, «askotan uste dugu aterpetxeak talde antolatuentzat baino ez daudela eskuragarri, eta ez jendearentzat oro har, eta, egia esan, urritik aurrerako asteburuetan, aukera asko daude instalazio bikainez ez ezik, Barriak, Espejok eta Zuhatzak eskaintzen dituzten abentura eta natura aukerez gozatzeko, eta gainera, arrazoizko prezioan, aterpetxe horiek publikoak baitira».
Horrela, nabarmendu dutenez, Barriako aterpetxea antzinako monasterio zistertar bat da, gazteentzako aterpetxe gisa birgaitua. Kanpoko fatxadan eta barruko egituran monasterioaren estetika osoa mantentzen du, baina, aldi berean, etengabe egindako birmoldaketen ondoren, taldeei eta aterpekideei ostatu emateko beharrezkoak diren erosotasun guztiak eskaintzen ditu.
Berdegune handiak, bilera edo jarduera gelak arbela elektroniko edo kainoi proiektatzailearekin, wifia, kirol zelaiak, espazio berdea (baratze ekologikoa, oilategia eta eguzki sukaldea dituena), kirolak txikientzat eta igerilekua ditu. Lau, sei, zortzi, 12 eta 24 lagunentzako logelak ditu.
Bestalde, azpimarratzekoa da Espejoko gazte aterpetxea eskola zaharreko lursailean dagoela. Eraikin berri eta modernoa da, eta familiak eta era guztietako taldeak hartzeko behar diren erosotasun eta zerbitzu guztiak ditu. Omecillo ibaiaren parke igerilekuaren ondoan dago, eta kanpoko espazioa eta ingurua ditu azpimarragarri.
Saskibaloi, minibasket eta futbito kantxak, ping pong mahaiak, bizikleten mailegu zerbitzua eta abar ditu. Gainera, Espejo udalerriak frontoi estali bat du. Hiru, bost, sei eta zortzi lagunentzako gelak ditu, guztiak komunarekin. Wifi, TB eta DVDz hornitutako bost areto ditu.
Azkenik, Zuhatza uharteko gazte aterpetxea Uribarri Ganboako urtegiko 500.000 metro koadroko uharte batean dagoela gogorarazi dute, Gasteiztik 15 kilometrora. Toki ezin hobea da benetako kanpaleku baten antzera ingurune naturalaz gozatu nahi duten taldeentzat.
Hamar eremu desberdinetan banatuta dago, eta bakoitzean egurrezko etxola bat dago, 12 lagunentzako, eta jarduerak egiteko estalitako etxola tailer bat. Jangela komun bat, komun eta dutxarako hiru eremu guztientzat, kirol instalazioak (pontoia duen bainugunea, pilotaleku estalia, rokodromoa, pista amerikarra) eta wifi eremua ditu.
Aterpetxeren batean erreserba egin nahi dutenak, beraz, Gazteriaren Foru Erakundearekin harremanetan jarri beharko dira, 945 18 19 88 telefonoan, edo Alberguesifj@araba.eus helbide elektronikora mezua bidali. Ez ezazue pentsa, eta anima zaitezte!
