https://static.elcorreo.com/www/menu/img/zurekin-desktop.jpg

Asteburuan hasiko dira Seaskaren 50. urteurreneko jarduerak, bertso saioarekin

Maialen Lujanbio eta Amets Arzalluz./DV
Maialen Lujanbio eta Amets Arzalluz. / DV

Herri Urrats izango dute ekitaldi nabarmenena, baina aurretik, 'Goazen!' telesailaren azken atala estreinatuko dute, estreinaldi orokorra baino egun bat lehenago

AMALIA IBARGUTXI

«50 urteko historia, borroka eta ametsez betetako bost hamarkadak» ospatzeko, jarduera sorta prestatu du 'Ipar Euskal Herrian euskaraz ikasteko' ekimenak. Herri Urrats izango dute ekitaldi nabarmenena, baina aurretik, 'Goazen!' telesailaren azken atala ikusi eta Berri Txarrak, Willis Drumond, Xiberoots, Diabolo Kiwi eta Txakatuk txarangak kontzertuak egingo dituzte.

1969an zabaldu zuen lehen ikastola Seaskak, Arrangoitzen, Lapurdin. Ipar Euskal Herrian, egun, 3.700 ikasle eskolatzen ditu bere 36 ikastexeetan. Ipar Euskal Herrian euskaraz ikasteko aukera eskaintzen duen sistema bakarra da Seaskarena, eta 50. urteurrenaren harira, musika jaialdia eta 'Goazen!' telesailaren azken atalaren estreinaldiak egingo dituzte.

Lehendabizi, ordea, Bectso Saioa egingo dute igandean, hilak 10, Senperen, Txapelketa Nagusiko zortzi bertsolari finalistek. BECen aritu ziren Unai Agirre Goia, Amets Arzallus, Sustrai Colina, Igor Elortza, Beñat Gaztelumendi, Maialen Lujanbio, Aitor Mendiluze eta Aitor Sarriegi, alegia.

Urtean zehar, zenbait jarduera kultural prestatuko dituzte. Bertso saioa eta gero, otsailaren 14an, ostegunez, 'Goazen!' telesailaren azken atala eskainiko da, Hendaiako Anton Abadia auditoriumean, 18:30ean. Gero, 16an, Biarritzeko Iraty aretoan egingo dute urteurren-jaia, arratsaldeko 19:00etatik aurrera. Berri Txarrak, Willis Drumond, Xiberoots, Diabolo Kiwi eta Txakatuk txarangak egingo dituzte kontzertuak.

Herri Urrats, festa handia

Festa handia, hala ere, maiatzaren 12an izango da, Herri Urratsen ospakizunarekin. Maiatzean, Integrazio Batzordearen 20 urteak ospatuko dituzte «dantza ikusgarri baten inguruan»; ekainaren 9an, Seaskaren 50 urteen herri bazkaria egingo dute; uztailean Realaren futbol partida batean izango dira; eta urriaren 18 eta 19an, azkenik, Seaska, Diwan, Calandreta, La Bresola eta ABCM murgiltze ereduen inguruko jardunaldi pedagogikoak, Baionan. Gainerako jardueren berri aurrerago emango dutela jakinarazi dute antolatzaileek.

2019. urtean, Seaskak eta ikastolek beteko duten mende erdia, «50 urteko historia, borroka eta ametsez betetako bost hamarkada». Uste dute, jarduera hauekin, beren herriko «lokarri soziala bermatzeko eta euskara eta euskal kultura biziarazteko» lanei ari zaizkiela laguntzen.

Orain dela 10 urte lehen hezkuntzan ikasleen %5a eskolatzen zuten. Gaur egun, %10. Espero dute, beste hamar urteren buruan, %15a baino gehiago eskolatzea, «%20 izatera hurbilduz, eta lehen mailan ezagututako hazkundea kolegioetara eta lizeora hedatuz» pixkanaka.