https://static.elcorreo.com/www/menu/img/zurekin-desktop.jpg

Arabako literatura sarietara 1.403 lan aurkeztu dira

Arabako literatura sarietara 1.403 lan aurkeztu dira
Fotolia

Lehiaketak hiru kategoria barnebiltzen ditu: ipuina, saiakera eta poesia

UNAI SARRIUGARTE

Arabako Foru Aldundiak antolatutako literatura sarietara 1.403 lan aurkeztu dira, iazko edizioan baino 627 lan gehiago. Lehiaketak hiru kategoria ezberdin barnebiltzen ditu: ipuina, saiakera eta poesia. Epaimahaiak udazkenean hausnartu eta erabakiko du zeintzuk izan diren lan irabazleak.

Kultura eta Kirol foru diputatua den Ana del Val pozik agertu da aurtengo datuekin. Valek gaineratu duenez aurtengo lehiaketak harrera bikaina izan du. Bere esanetan: «hainbeste lan aurkeztu izanak, literatura sorkuntza oso bizirik dagoela erakusten du».

Ignacio Aldecoa Ipuin Lehiaketaren XLVIII. edizioan 989 hautagaitza aurkeztu dira, gaztelaniazko 962 eta euskarazkoak, berriz, 27 lan izan dira. Epaimahaiak hauek aztertu eta hauen artean erabaki beharko du. Hizkuntza bakoitzeko irabazleak 6.000 euroko diru-laguntza irabaziko du.

Bestalde, Becerro de Bengoa saiakera lehiaketaren XXXI. ekitaldian 70 lan ezberdin aurkeztu dira, iazko edizioan baino 45 lan gehiago, pasa den urtean 25 izan baitziren. Garaikurrak Arabako akademiko eta kazetari historiko baten izena darama eta bertan 8.000 euro banatuko dira, 4.000 euro euskararazko lan hoberenarentzat eta beste 4.000 gaztelaniazko lan onenarentzat.

Azkenik, Ernestina de Champourcin poesia lehiaketaren XXX. edizioan 344 obra ezberdinek hartu dute esku, iaz aurkeztutako hautagaitzen ia laukoitza. Euskaraz zortzi poema sorta burutu dira eta gaztelaniaz, berriz, 336. Esparru honetara 4.000 euro bideratuko dira, 2.000 euro hizkuntza bakoitzeko.