https://static.elcorreo.com/www/menu/img/zurekin-desktop.jpg

Apirilaren 11n igaroko da Bilbotik Korrika

Apirilaren 11n igaroko da Bilbotik Korrika
Ignacio Pérez

'Klika' lelopean, apirilaren 4tik 14ra egingo da Korrika, Garestik Gasteizera. Webgunean kontsultagarri dago egunez eguneko egutegia

AMALIA IBARGUTXI

Jakina da apirilaren 4tik 14ra egingo dela Korrika, Gares abiapuntu eta Gasteiz helmuga hartuta. 'Klika' lelopean, euskararen aldeko hautua egin eta «euskararen aroarekin bat egitera» animatuko dituzte parte-hartzaileak, Euskaraldia ariketa soziala ere gogoan. Hamar egun horietan, noiz eta nondik igaroko den Korrika jakinarazi du orain AEK erakunde antolatzaileak. Bilbotik apirilaren 11an igaroko da.

Euskal Herri osoan barrena eramango dute euskararen aldeko lasterketa. Ohi bezala, aurreko Korrika amaitu zen herrialde berean hasiko da aurtengoa, Nafarroan. Garestik abiatuko da mezu sekretua daraman lekukoa apirilaren 4an, arratsaldeko 17:00etan. Hurrengo hiru egunetan, Nafarroako hegoaldean ibiliko da lasterketa, eta apirilaren 6ko iluntzean, larunbatean, Iruñera iritsiko da.

Lehen hiriburutik igaro eta gero, apirilaren 7an, beste hiru hiriburutatik pasako da: Donibane-Garazi, Maule eta Baionatik, hain zuzen. Hilaren 8ko goizean Gipuzkoan sartu-irtena egin ondoren, Lapurdi eta Nafarroara sartuko da berriro.

Apirilaren 9an, asteartez, Nafarroa eta Araban ibili ondoren, Bizkaian sartu eta Ibaizabal zeharkatuko du, hilaren 10eko gauerdian, hurrengo eguneko 12:00etan Bilbora heldu arte.

Hilaren 12 eta 13an, nagusiki Gipuzkoan izango da lasterketa, eta Bizkaian sartuko da berriro, bederatzigarren eguna Otxandion amaitzeko. Korrikaren azken egunean, Arrasatetik Gipuzkoara sartuko da berriz, Gasteizerako bideari ekin aurretik. Andre Maria Zuriaren plazan amaituko du ibilbidea Korrikak, otsailaren 14ko eguerdian. Mezuaren irakurketa eta amaierako jai handiaren hasiera eguerdiko 12:30erako aurreikusita dago.

Herriz herri egingo den ibilbide osoa kontsultagarri dago hemen, eta kilometroak erreserbatzeko aukera urtarrilaren 14an zabalduko da.

Temas

Euskera