https://static.elcorreo.com/www/menu/img/zurekin-desktop.jpg

Amurriok gidaliburu bat argitaratu du alkohol eta kalamuaren kontsumoari buruz

Aste honetatik aurrera, 2.000 ale baino gehiago banatuko dira lantokietan

I.AGOTE

Amurrioko Udalak, Laguntza Psikologiko eta Pedagogiko Kabinetearen bidez, “Drogak ez doaz lanera” gidaliburua aurkeztu du gaur goizean. Liburuxka hori, alkohol eta kalamuaren kontsumoari buruzkoa, udalerrian kokatuta dauden enpresetako langileentzat da. Aste honetatik aurrera, 2.000 ale baino gehiago banatuko dira lantokietan. Halaber, datorren urtearen hasieran enpresetan praktikak egiten hasiko diren LHko 2. mailako ikasleen artean ere banatuko da.

Gidaliburuak bi helburu dauzka: “alde batetik, langileei eta LHko ikasleei drogak hartzeak epe laburrera eta ertainera dakartzan ondorioak jakinaraztea eta arazo horrekiko sentikortzea eta, bestetik, drogen erabiltzaileak kontsumoa edo horren ondorio diren arazoak murrizteko teknika espezifikoetan prestatzea”, adierazi du Osasun, Hezkuntza eta Kirol Saileko zinegotzi Txerra Molinuevok.

Euskaraz eta gaztelaniaz argitaratutako gidaliburuaren asmoa da informazio argia eta erraza ematea alderdi hauen gainean: alkohol eta kalamuaren kontsumoak lan-arloan dakartzan ondorio orokorrak, drogen erabilera desegokiak lanean sortzen dituen arazoak, kontsumo arduratsua (ez arazotsua) izateko jarraibideak, legezko alderdiak edo neurriz gain kontsumitzen duena medikuaren kontsultara bideratzeko modua.

Drogen kontsumoko jarraibideei eta kontsumoaren ondorioei buruz lan-arloan egin diren hainbat azterlanen emaitzek nabarmen kezkatzen dituzte enpresetako Segurtasun Batzordeak. Alkoholaren gaineko datuen arabera, langileen % 6-12k alkohol gehiegi edaten dute egunero. Kalamuari dagokionez, noizbehinkako kontsumoak % 10-15 artean dabiltza eta langileen % 2-5ek egunero kontsumitzen dute.

Drogen kontsumo desegokiak era askotako arazoak sortzen ditu lan-arloan, hala nola, istripuak, produktibitate txikia, gizarte-harremanetako gatazkak, irudi txarra edo zailtasun ekonomikoak eta pertsonalak.

Udalerria baino lurralde-eremu handiagoko erakundeek, enpresetan zuzenean jokatzen dute arazo horri aurre egiteko. Amurrioko Udalak liburuxka hau Amurrioko Droga-mendekotasun Planaren barruan kokatu du, hain zuzen ere, Enpresetan Alkohola Prebenitzeko Programan. Izan ere, Amurrio da gai horri buruz bere argitalpena duen udalerri bakarra.

“Programak jarduera batzuk barne hartzen ditu, batez ere, prestakuntza-jarduerak, enpresa-eremuaren barruan alkohol eta kalamuaren kontsumo desegokitik ondorioztatzen diren arazoak gutxitzeko, eta enpresako estamentu guztiekin, Zerbitzu Medikoekin, Prebentzioko Batzordeekin eta abarrekin koordinazioan egiten da”, zehaztu du Laguntza Psikologiko eta Pedagogiko Kabineteko Gotzon Mínguezek.

Horiek horrela, prebentzio-programari dagokionez, Amurrioko Udalak jarduera osagarriak egiteko aukera eskaintzen du, esate baterako, enpresetan ikastaroak eta tailerrak antolatzea, kontsumo desegokiaren ondoriozko arazoen ondorioak gutxitzeko jarduerak –prestakuntzakoak ez direnak– taxutzea, berariazko arauak, ingurune-diseinua edo arriskuak urritzeko estrategiak. Era berean, drogak erabiltzeagatik zailtasunak agertzen dituzten banako kasuei arreta ematen zaie: autokontroleko eta kontsumo arduratsuko jarraibideak irakasten zaizkie edo mendekotasuna gainditzeko programa batera bidaltzen dira.

Gaur egun, laneko istripuen % 15-30ek zerikusi zuzena du drogen kontsumo desegokiarekin.

Contenido Patrocinado

Fotos

Vídeos