https://static.elcorreo.com/www/menu/img/zurekin-desktop.jpg

Aldundiaren diru laguntzak, Arabako Errioxako konpostaje proiektuentzako

Aldundiaren diru laguntzak, Arabako Errioxako konpostaje proiektuentzako

Sistema berria abian jarri zenetik, Kuadrillak 10 tona hondakin organiko kudeatzen ditu, eta aurreikusten da 2018an urteko 25 tona arte iritsiko dela

I.AGOTE

Josean Galera Ingurumen eta Hirigintza Saileko foru diputatua Arabako Errioxara joan zen aurreko astean, konpostaje proiektu berriak ezagutzera. Arabako Foru Aldundiak diruz lagundu ditu proiektu horiek, zeinei esker hondakin organikoak —batez ere, elikagai soberakinak— biltzeko sistema ezarri ahal izan baita eskualdean.

Zehazki, Guardia – Arabako Errioxako Kuadrillak konpost ontzi komunitarioak jarri ditu Samaniegoko eta Lantziegoko udalerrietan (ikastetxean eta herrian bertan). Proiektu horien asmoa da «abiapuntua izatea, jardunbide hori, etorkizunean, Arabako Errioxako eskualde osora hedatu dadin», nabarmendu du Josean Galerak, zeinek eskertu du «halako ekimenak egitea inguru horretan eta Arabako Errioxako herritarrek egindako kontzientziatze lana».

Izan ere, Arabako Errioxan guztira 6.620 tona hondakin sortu ziren 2016an, eta hondakin horien % 24 bereizi zen, gero birziklatzeko edo berrerabiltzeko. Alegia, eskualdeko biztanle bakoitzak urtean batez beste 592 kilo hondakin sortu zituen. Hondakin organikoen bereizketa ezarri ondoren, asmoa da gainerako hondakinen ontzira —hau da, edukiontzi grisera— zabor gutxiago botatzea. Hori dela eta, foru diputatuak eskerrak eman ditu kuadrillan «bultzada handia» ematen ari direlako «hondakinen kudeaketa jasangarriagoa eta ingurumenarekin arduratsuagoa» egin dadin. «Ezinbestekoa da gure hondakinak modu jasangarrian kudeatzea eta konpostaje komunitarioaren eta, beraz, tokiko jasangarritasunaren eta ingurumenaren alde egitea», gogorarazi du Galerak.

Hain zuzen, Arabako Samaniego udalerrian, konpostaje komunitariorako zona bat jarri dute, eta etxeetan gai organikoak bereizten hasteko prestakuntza eta materiala jaso duten 35 familiak parte hartzen dute bertan. Hain izan zuen arrakasta handia ekimenak abian jarri zenean bertan, ezen hasiera batean ezarritako zona handitu eta neurriak berriz zehaztu behar izan baitziren.

Kuadrillak ikastetxeetan ere konpostatzearen alde egin du, denetan baitago eskola jantokia. «Eredu ona da, ez soilik zabortegira iristen diren hondakinak murriztearena, herritarrak gazte-gaztetatik kontzientziatzearena ere bai», adierazi du foru diputatuak, pozik. Horixe da Lantziegoko ikastolaren kasua, non konpostaje gunea ere badaukaten; eta Lapuebla de Labarcako ikastolan prestatzen ari dira.

Egin duen bisitan, Josean Galerak gogorarazi du aldundiak finantzatzen duela hondakinen bilketan edo kudeaketan gai organikoak biltzeko sistema ezartzeak Arabako kuadrilla eta udalei dakarzkien gastuen zati bat. Horren harira, iragarri du aldundiaren 2018rako aurrekontuan partida bat dagoela, 125.000 eurokoa, horrelako proiektuetarako, eta toki erakundeak animatu ditu gai horretan lanean jarrai dezaten.

Temas

Euskera

Contenido Patrocinado

Fotos

Vídeos