https://static.elcorreo.com/www/menu/img/zurekin-desktop.jpg

Alde zaharretik dantzatu nahi? Aste Nagusian aukera daukazu

Alde Zaharretik dantza egiteko aukera izango dute interesdunek./Aiko taldea
Alde Zaharretik dantza egiteko aukera izango dute interesdunek. / Aiko taldea

Euskal dantza tradizionala hedatzen duen musikari eta dantza maisuen taldearen topagunea 13:00tan izango da, Txakur kaletik abiatuta

EL CORREO

Bilboko Alde Zaharra dantzagune bihurtuko du hurrengo ostegunean Aiko taldeak, abuztuaren 23an, bere ohiko dantzapoteoarekin. Euskal dantza tradizionala hedatzen duen musikari eta dantza maisuen taldearen topagunea 13:00tan izango da, eta Alde Zaharreko hainbat tokitatik ibiliko da, Txakur kaletik abiatuta.

Antolatzaileek azpimarratu dutenez, taldeko musikari eta dantza maisuek Bilboko Alde Zaharreko kaleak alaituko dituzte, hurbiltzen den edonor dantzatzera eta abestera gonbidatuz, dibertsio eta gozamen giroan. Sabin Bikandik, txistu eta danbolinarekin; Alvaro Garciak, gitarrarekin; Txus Aranburuk, akordeoiarekin; eta Amaiur Cajaravillek, kontrabaxuarekin, dantzarako errepertorioa eskainiko dute guztion gozamenerako.

Horrela, interesdunek pasodobleak, balsak, jotak, eskudantzak, porruak, jauziak, mazurkak edota sokadantzak dantzatzen parte hartu ahal izango dute. Musika entzuten den bitartean, Patxi Laborda, Katalin Zarate, Abel Iriondo eta Josu Zarate, Aiko Taldeko dantza maisuak, dantzak gidatzen arituko dira. Jakin ezazue beharrezkoa den bakarra dantza egiteko gogoak direla.

Topagunea Txakur kalean izango da eta hortik Alde Zaharreko hainbat kaleetatik mugituko dira, Santa María, Pilota, Barrenkale eta Jardines kaleetatik, hain zuzen, bertatik pasatzen den edonor dantzatzera animatuz.

Dantzarako espazio berrien bila

Aiko Taldea musikariz eta dantza maisuz osatutako elkarte kulturala da, eta duela 12 urtetik musika eta dantza tradizionalaren ondare zabala hedatzen eta ezagutarazten eta erromerien izpiritu herrikoia berreskuratzen ari da lanean, dantzarako espazio berriak sortuz eta gero eta talde zabalagoa inplikatuz. Taldearen bokazioa «modu natural, erlaxatu eta dibertigarrian jo eta dantzan egitea» eta pasio hori ahalik eta pertsona gehienei helaraztea da.

Euskal Herri osoan eskainitako erromeria, ikastaro, tailer eta emanaldi ibiltari kontaezinekin batera, taldearen jarduera ez da zuzeneko emanaldietara mugatu. Aiko Taldeak dantza egiteko musikaz osatutako 11 disko argitaratu ditu, eta kultura herrikoiaren ondarea ikertzeko eta hedatzeko beste zenbait ekimenen protagonista izan da.

Temas

Euskera
 

Fotos

Vídeos