https://static.elcorreo.com/www/menu/img/alava-desktop.jpg

Bisoi europarrak beste babesleku bat izango du Bastidako Andaberde bihurgunean

Bisoi europarrak beste babesleku bat izango du Bastidako Andaberde bihurgunean

Ebro ibaian dagoen eremu horren leheneratze ekologikoa egiteaz gain, uholde arriskua duten antzinako eremuak ere berreskuratu dituzte

PAUL PICADO

Bisoi europarrak beste babesleku bat izango du hemendik aurrera Bastidan, izan ere, Ebro ibaian dagoen Andaberde bihurgunearen inguruan leheneratze lanak egin dituzte, desagertzeko arrisku handia duen ugaztun horrek habitat egokia izan dezan. Lan horiez gain, uholde arriskua duten antzinako eremuak ere berreskuratu dituzte, eta ibaia barrualdeko aintzirarekin lotu dute. Bestalde, Bastidako eta Gasteizko 130 ikaslek bertako 1.900 zuhaitz baino gehiago landatu dituzte eremuan.

Eremuaren leheneratzea Europako LIFE Lutreola proiektuaren barruan dago, eta egindako lanei esker, eremua 50eko hamarkadan zegoen moduan uztea lortu dute. Horrela, mota artifizialaren garaiera txikiagotu dute, erriberako landaredia handitu, eta bisoi europarren jaten dituzten intsektu, karramarro, narrasti edo anfibioek babeslekutzat erabil ditzaketen mikroerliebeak eta mikrohabitatak sortu dituzte.

Bisoi europarra babesteko beste jarduera batzuk ere egin dituzte, hala nola tranpa flotagarriak jartzea, hain zuzen ere bisoi amerikarra kontrolatzeko, espezie inbaditzailea delako eta bisoi europarrarentzat oso arriskutsua delako. Guztira 80 tranpa baino gehiago jarri dituzte Ebro ibaian zehar, eta horri esker, 2015. urtean 109 bisoi amerikar harrapatzetik, 2018. urtean bisoi amerikar bat bakarrik harrapatzera pasa dira.

Beraz, esan daiteke Araban bisoi amerikarra ia desagertuta dagoela, eta horrenbestez, bisoi amerikarraren egoera nabarmen hobetu dela. Europa osoan, desagertzeko arriskurik handiena duen ugaztuna da, batik bat bisoi amerikarrarengatik, eta bere habitat eta babeslekuen narriadurarengatik.