https://static.elcorreo.com/www/menu/img/zurekin-desktop.jpg

Adineko pertsonentzako Eguneko Zentro berri bat eraikiko dute Bilbon

Gizon bat ariketak egiten Eguneko Zentro batean./Avelino Gómez
Gizon bat ariketak egiten Eguneko Zentro batean. / Avelino Gómez

Zerbitzu horrek 60 plaza eskainiko ditu eta desgaitasuna ebaluatzeko Aldundiaren Zerbitzua zegoen bulego zaharrak okupatuko ditu

ELCORREO.COM

Mendekotasun egoeran diren adineko pertsonentzako eguneko zentro berria irekitzeko prozesua jarri du martxan Bizkaiko Aldundiko Gizarte Ekintza Sailak. Zentro horrek 60 plaza izango ditu eta desgaitasuna ebaluatzeko Aldundiaren Zerbitzua zegoen bulego zaharrak okupatuko ditu, Bilboko Marcelino Oreja kaleko 3. eta 5. zenbakietan.

2019. urtean hasiko den eguneko zentro berri horretarako inbertsioa 661.000 eurokoa izango da eta 800 m2 dituela aprobetxatuz, zenbait eremu ezberdin izango ditu: berbarako, pertsona guztiek erabiltzeko guneak, atondoa, zereginetarako jarduerak gauzatzeko bi unitate, erabiltzaileentzako banako lanerako bi gune eta erabilera anitzeko eremu bat non aisialdirako gunea, gimnasioa, atseden-lekua, jantokia eta sukalde-ofizioa, biltegia, garbiketa-zerbitzuaren gela, garbitokia etab. izango diren.

Aldunditik adierazi dute Bizkaiak baduela mendekotasun egoeran diren pertsonei arreta egiteko «sare aurreratua, zenbait kasutan aitzindaria eta, eskualdeei dagokienez, zeharo orekatua, Gizarte Zerbitzuei buruzko EAEko Legean jasotzen diren plangintzarako tresnen ondoriozko gizarte zerbitzuen maparekin bat datorrena». Hortaz aparte, azpimarratu dute «eguneko zentroek berebiziko funtzioa» betetzen dutela, zerbitzu profesional osagarri egokia ematen baitiete adineko pertsona batek bere etxean jasotzen dituen zaintza formalei eta informalei».

Bizkaian 41 zentro daude

Aldundiko arduradunek gogorarazi dute ere bai, zentroak bereziki diseinaturik daudela mendekotasun-egoeran diren adineko pertsonei egunezko orduetan arreta indibidualizatu integrala eskaintzeko. Zentzu horretan, ondoko hauek dira zentro horietan jorratzen diren programen xede nagusiak: adinekoen autonomia hobetzea edo autonomia pertsonal horri eustea, muga funtzionalak konpentsatzea eta mendekotasu egoeran diren pertsonen zaintzaileei laguntza ematea, prebentzioaren arloko prestazioen eta gaikuntza eta laguntza alorretako prestazioen bidez, betiere autonomia pertsonalerako trebetasunak lantzeko eta erkidegoari dagozkion ingurune guztietan parte hartzeko.

Zehazki, Bizkaiko Foru Aldundiak eguneko 41 zentro ditu gaur egun Bizkaian. Horietarik 24 BFAren titulartasunekoak dira eta gainerakoak, berriz, BFAk finantzatzen dituen plazak dauzkaten udal titulartasunekoak edo titulartasun pribatukoak. 2017. urtean, mendekotasun-egoeran diren adineko 1.309 pertsonak jaso zuten Lurraldean diren eguneko zentroei dagokien foru zerbitzua.

Temas

Euskera

Contenido Patrocinado

Fotos

Vídeos