Elorrion ospatuko da Durangaldeko Bulkada Eguna martxoaren 23an

NAHIKARI CAYADO ELORRIO.

Lehengo eta oraingo esperientziak batuta, hurrengo gazte belaunaldiari lekukoa ematea da Bulkada Egunaren helburua. Horrela aurkeztu zuten Elorrioko Gazte Topaguneko kideek «Bide guztiak Elorriora, bide guztiak independentziara» leloa izango duen jaialdia. Martxoaren 23an izango den hitzordua eskualdeko gazteen topalekua izango da. Bertan, durangaldeko gazteak eta ez hain gazteak ere batuko dira jai giroan, eta Aste Santuan zehar Lemoan ospatuko den Gazte Topagunearen atariko ekimena izango da.

Ekintzak goizeko 12.30 etan hasiko dira, eskualdeko gazte sortzaileen lana plazaratzearekin batera. Bi ordu geroago, bazkaria ospatuko da leku berean. Arratsaldeko lauretan bingo musikatua eta durangaldeko mus txapelketako finala ospatuko dira. Ondoren, Zornotzako Kittu taldearen musikak ekingo dio poteoari 17.30etatik aurrera. Bi ordu geroago, plazako karpan ekitaldi politikoa ospatuko da.

Gauean musika izango da jaialdiko protagonista. Hamarretatik aurrera, Kaleko Urdangak, Ezetaerre eta Gora Etorri taldeek eskainiko dituzte kontzertuak plazan. Goizeko 02.00etan aldiz, Dj Bull-ek dantzan jarriko ditu Gaztetxera hurbilduko diren guztiak. Bazkarirako tiketak ohiko lekuetan daude salgai 10 eurotan. Ikasleek ordea, 5 euro ordaindu beharko dituzte. Bestetik, Bulkada Egunean zehar pegatinen erakusketa izango da, portalekuan.

Temas

Elorrio