Japoniar gastronomia, aurtengo protagonista Durangoko Ardo Saltsan

Sushia izango da protagonista Ardo Saltsan azokan./
Sushia izango da protagonista Ardo Saltsan azokan.

Landako Gunean ospatuko da bihar azoka arrakastatsua, 4.500 metro karratuko eremua hartuko duena

VIRGINIA ENEBRAL

Egun batez ardoa eta 'delicatessen' produktuen hiriburua bihurtuko da Durangaldeko hiribildua, Ardo Saltsan azoka ospatuko baita bihar Landako Gunean. Ahogozoa egingo zaie hurbiltzen diren guztiei, 4.500 metro karratuko eremuan antxoak, olagarroa, gaztak, ketuak, ostrak, beltzadun baratxuria eta tomate iberikoa, besteak beste, dastatzeko aukera izango dutelako. Dena hirurogeiren bat upeltegiko ardoekin lagundurik janda. Badaezpada garagardoak ere egongo dira. "Edaria eta janaria batzen duten beste azokak ez ditugu ezagutzen eta bat-egite horrengatik dauka hainbeste arrakasta jardunaldi honek", ziurtatzen dute ekimenaren antolatzaileek, "hezkuntza aldea" ere azpimarratzen dutelarik. Zortzigarren edizio honetan, japoniar gastronomia izango da protagonista. Beraz, sukaldaritza honi buruzko ikasgai magistrala irakatsiko da. Gainera, gunean prestatutako jatetxeak gastronomia honetan oinarritutako platerak eskainiko ditu.

Iaz mila pertsona hurbildu ziren gutxi gorabehera, Durangaldetik ez ezik, Kantabria eta Frantziatik ere. Hala ere, kopuru hori handitu dadin espero dute. "Jende gehiago eta leku ezderdinetatik etortzea da gure aurtengo asmoa", diote bultzatzaileek. Gastronomia edota ardozaleak zein ostalariak erakarri ditzaten era askotako ekintzak antolatu dituzte, izan ere, bai goizean bai arratsaldean ardo-dastatzeak egongo dira, zazpietakoa itsu-itsuan izango bada ere. Hamabost euroko sarreran azokan bilduko diren edari eta berezitasunez gozatzeaz gain, kopa bat sartuta dago. "Eskaintzen denagatik ez da batere garestia, horrela adierazten digute behintzat etortzen direnek. Guk adin guztietako jendea hurbil dadila animatzen dugu".

Contenido Patrocinado

Fotos

Vídeos