Alhondigatik Nafarroako gobernura

"Ilusioz beteko etapa" hastear da Fernando Pérez Gómez. Hori bai, "pena apur bat" sentitzea saihestezina zaio, oso gustura egon baita Bilboko Azkuna Zentroko programatzaile bezala. 48 urte dituela, sestaotar hau Nafarroako gobernura iritsiko da hurrengo egunetan. Uxue Barkosen taldearen azken fitxaketa izan da, kultura arloan dituen baliabideak kontuan hartuta. Izan ere, Alhondiga inauguratu zen egunetik, Fernando Pérez Gómez izan zen bere programatzaile nagusia. Orain, ordea, Nafarroako Kultur Zuzendaritzan egingo du lan.

Betidanik egon da Bilbora lotuta, Bizkaiko hiriburuko Udalean bertan hasi baitzen lanean 1991ko uztailean. Orduan eta bihar arte izango dituen lankideek bere 'whatsapp'-a sutan dute egunotan, eta Lourdes Fernández Azkuna Zentroko zuzendariak ere zoriondu du, nahiz eta bere postua bete dezan beste inor oraindik ez duen. "Bilborentzat oso garrantzitsua da beste instituzioek Azkuna Zentroan lan egiten duten langileak izatea".