Euskaltzaindiak literatura lanak doanik eskaini dizkie Euskal Herriko ikastetxeei

Euskara sustatzea da euskaltzaindiaren helburu nagusia eta, gauzak horrela, bere Argitalpen zerbitzuaren bitartez, Euskal Herriko ikastetxeei Bilbao Bizkaia Kutxa-Euskaltzaindia literatura lehiaketako lanak doan eskaini dizkie.

Saritutako lan askoren ale ugari Euskaltzaindiko gordailuan daude, eta orain, Euskaltzaindiak, lan hauek irakurle gazteen esku jarri nahi ditu. Horretarako, literatura generoaren araberako bost liburu sorta Euskal Herriko ikastetxeei doan eskaini zaizkie, Akademiako iturriek jakinarazi dutenez.

Bestalde, ikastetxeetako irakasleek ere liburu sortak jasotzeko eskaria egin dezakete hurrengo helbide honetan: http://www. euskaltzaindia .net/index.php?option=com_contact&view=contact&id=12:argitalpen-banaketa-zerbitzua&catid=274&lang=eu

Bilbao Bizkaia Kutxak eta Euskaltzaindiak 1958 eta 2008 urte bitartean literatura sariak antolatu dituzte, lau literatura-alorretan: Txomin Agirre eleberri sariak, Felipe Arrese Beitia olerki sariak, Toribio Altzaga antzerki sariak eta Mikel Zarate saiakera sariak. Urte hauetan zehar, euskal letratan esanguratsuak diren idazle ugari sarituak izan dira.

Halaber, 1991tik aurrera eta gaur egun ere, haur eta gazteentzako narrazio eta olerki sariak antolatzen dituzte bi erakundeek. Sariketa honetako irabazle batzuk, urteak aurrera egin ahala, ezagun egin dira euskal literaturan.