'Klika Korrika' egiteko prest

Euskal Herrian ez eze, munduko hainbat herrialdetan izaten dira Korrikaren aldeko ekimenak. /  IGNACIO PÉREZ
Euskal Herrian ez eze, munduko hainbat herrialdetan izaten dira Korrikaren aldeko ekimenak. / IGNACIO PÉREZ

Euskararen aldeko martxa Bakiotik sartuko da gaur (20.15) Busturialdean, eta Lea Artibaitik bariku goizaldean igaroko da

IRATXE ASTUI BERMEO.

Korrikaren 'Klika' gero eta hurrago entzuten hasi da Kostaldeko zonaldean. Euskal Herri osoan zehar egiten dan euskararen aldeko martxa erraldoia gaur bertan sartuko da Bakiotik Busturialdean, 20.15ak aldera. Aurtengoan, izan be, 2017an egin eban kontrako ibilbidea hartu dau 21. Korrikak, 'Klika' lelopean.

Eskuz esku eta kilometroz kilometro Korrikaren lekukoa Mundakatik igaroko da, 21.00ak inguru, eta ordubete eta erdi beranduago, gitxigora behera, Gernikara heltzea espero da. Handik Gautegiz Arteagarako bidea hartuko dau martxak, 23.30etik aurrera.

Ibarrangelu (00:09), Ea (00.28) eta Bedarona (01.10) atzean itxita, Lea Artibaiko lurrek zapaldu eta ibiltzen hasiko da, apurka-apurka, barikuko ordu txikietan. Eskualdeko bizilagunen esku geratuko da ikurrina Ispasterrera sartzen dan momentutik aurrera. Hitzordu hori 01.20erako iragarrita dago.

Lekeitioko kaleetatik 'Klika' en-tzungo da, 01.32ean; Amorototik (Oleta), 02.14ean, eta Gizaburuagatik, 02.21ean. Korrikalariek 03.09ean zeharkatuko dabe Aulesti herria, Markina-Xemeinera sartu orduko, 03.40ean.

Berriatua (04.47) eta Ondarroa (05.06) izango dira Korrikaren azken bi etapak, Lea Artibaiko eskualdetik. «Handik Mutrikurako bidea hartuko dau Korrikak, goizaldeko seirak inguruan», azaldu dabe 'Korrika' martxaren antolatzaileak diran AEK-ko ordezkariek.

Eguneroko lana indartzeko

Korrika Kulturaleko ekitaldiez gainera, askok eta askok Korrika Txikietan parte hartzeko tartea hartuko dabe. Arratzun eta Natxitun (Ea), bihar arratsaldean egingo dabe euren Korrika Txikia. Gaur goizean, bestalde, Busturiako, Gernikako eta Muxikako ikastetxeetako ikasleek hartuko dabe Korrika Txikiaren lekukoa. Gaur arratsaldean, Foruan be egingo dabe martxa txikia.

Euskararen aldeko kontzientzia suspertzea eta euskaltegien eguneroko lana indartzeko dirua biltzea daukaz helburu Korrikak. Bihar arratsaldean Donostian sartuko da eta azken aurreko egunean -apirilak 12- Bizkaira joko dau, barriro. Durangaldeko eta Arratialdeko herrietatik mogitu eta gero, ekimena domekan amaituko da, Gasteizen. Amaiera ekitaldia 12.30etarako aurreikusita dago. Bai Busturialdetik eta bai Lea Artibaitik bertara joateko autobusak antolatu dabez.