http://static.elcorreo.com/www/menu/img/zurekin-desktop.jpg

Zabalganeko gizarte-etxeak ateak irekiko ditu, bertako 25.000 auzotarrei elkartzeko espazioak eskaintzea helburu

SERGIO EGUÍA

Ireki ditu ateak Zabalganeko gizarte-etxeak herritarrentzat, bertako 25.000 auzotarrei elkartzeko espazioak eskaintzea helburu duelarik. Lau egunez, 14 gizarte-etxeen sarea osatuko duten instalazio horiek bertatik bertara ezagutzeko aukera izango dute bai auzoko herritarrek, bai hiriko gainerako auzoetakoek. Gorka Urtaran alkateak nabarmendu duenez, eraikin oso abegitsua, argitsua eta ingurunean ongi integratua da, “jendea elkartzeko leku gisa pentsatua. Gizarte-etxe batean, inportanteena ez dira instalazioak, bertako jendea baizik. Harremanetarako eta elkar ezagutzeko leku aparta da gizarte-etxea”.

“Gasteizko gizarte-etxeen sarea garaien aurretik doan hiri-ereduaren bandera-ontzia da, José Angel Cuerda alkateak abian jarri zuena eta oraingo honetan ere, garai eta premia berrietara egokiturik, erabateko balioa duena, pertsonak jarduera politikoaren erdigunean jartzen baititu. Gure gizarte-etxeak komunitate-bizitzaren bihotza dira, 25 urtetik gora baitaramate hiriaren DNAren parte izaten, eta pertsonen garapen integralean laguntzen jarraitzen baitute. Gure hiriaren ikurretako bat dira”, adierazi du alkateak.

Orobat azaldu du Gorka Urtaranek gizarte-etxearen eragin-eremuan bizi diren 25.000 inguru lagunek, baita instalazio berriak erabili nahi dituzten gainerako gasteiztarrek ere, pertsona guztiei zerbitzu integralak eta integratzaileak eskaintzeagatik nabarmentzen den sare horretako gizarte-etxerik modernoenaz gozatzerik izango dutela.

Gizarte-etxeen arduradun Isabel Martínezek, bere aldetik, nabarmendu du udal sailen arteko koordinazioak ahalbidetu duela instalazioa gaur zabaltzea, eta urriaren 2tik aurrera, hots, astelehenetik aurrera ekingo zaiola bertan jardun arruntari, era guztietako jarduera eta lantegien programazio zabalarekin. Martínezek, era berean, oso modu positiboan baloratu du auzoko kolektibo eta elkarteek emandako laguntza. Erantsi du, halaber, gizarte-etxeen sarea aitzindaria dela “hurbileko zerbitzuak eskaintzerakoan, pertsonek kultur-eta kirol-ohitura osasuntsuak garatu ditzaten, aldi berean bizikidetza eta gizarte-kohesioa sustatzen direlarik“.

Instalazioak irekitzeko ekitaldia ohorezko aurresku batekin hasi da, kanpoaldean, Udaleko talde politiko guztien ordezkariak bertan zirelarik, baita Ramiro González ahaldun nagusia eta Arabako Batzar Nagusien lehendakari Pedro Elosegi ere. Instalazioak bisitatu dituzte guztiek ere, eta hartara ezagutu ahal izan dituzte bi igerilekuak, kiroldegia, hiru gimnasia-aretoak, kardio-gela, 290 lagun hartu ahal izango dituen ekitaldi-aretoa, bi hitzaldi-gelak, elkartze-aretoa, lantegiak, ludoteka, ikasteko gela, haurrentzako liburutegia eta helduentzakoa, udal liburutegi guztien biltegi zentrala, Kzgunea, ludokluba, oinarrizko gizarte-zerbitzua, ekitaldi-aretoa, herritarrei laguntzeko bulegoa eta beste.

Javier Maya eta Estela Arteche arkitektoen obra da gizarte-etxe berria, eta 15.650 metro koadroko lursailean eraiki da. Gaur hasi eta igandera arte, ateak irekitzeko egunak izango dira, eta ekipamendu berria ezagutzeko aukera emango duten hainbat jarduera egingo dira. Era berean, bisita gidatuak izango dira, gizarte-etxeak dituen zerbitzuen berri eman diezaietela nahi dutenentzat.

1989an ekin zatzaion gaur egungo gizarte-etxeen sarea eratzeari, gizarte-, kultur- eta kirol-instalazioak bilduz, urte horretan zabaldu baitzen Iparraldeko gizarte-etxea. Nolanahi ere, lau urte lehenago abian jarria zen Sansomendiko zentro soziokulturala. Eta guztien jatorria, 70eko urteen hamarkadaren erdialdera, Olarizun martxan jarri zen zentro sozialean bilatu behar da.

Fotos

Vídeos