http://static.elcorreo.com/www/menu/img/zurekin-desktop.jpg

Sinergia Guneak elkartuko ditu Gasteizko gazte sortzaileak

Norbanakoek eta gazte taldeek garatutako 15 proiektu aurkeztuko dira irailaren 30ean, Judimendiko parkean, burutuko den jardunaldian

SERGIO EGUÍA

Sinergia Gunea “egitasmoa, proiektua edo ekimena” abiatu dute Gasteizen. “Sormenean, kulturan, artean baina baita bestelako kontuekin ere ari diren gazteen ekimenen elkargunea behar da izan, elkarren artean ezagutu eta sinergia berriak sor daitezen”, azaldu du Gindi Auzmendik. ARTgia sorgune & aretoan aurkeztu dute egitasmoa ekimen honen sortzaileak, Mikel Buruaga, Iñaki Landa eta Gindi Auzmendi bera.

Gasteizko kultur alternatiboaren mapa sortzen hasi ziren lehenbizi. Orduan Gasteizko kulturaren egoeraren inguruko hausnarketa bat konpartitzen zutelako hasi ziren lanean “kulturaren esparruan ikustarazten ez ziren leku asko zeudelako, bestelako kultura bat ari zelako loratzen”. Proiektua burutzen ari zirela konturatu ziren pertsona edo gazte sortzaile hauen artean ere “ez zirela sarri euren artean ezagutzen, ez zeudela hibridaziorako kanalak, bideak falta zirela”. Horregatik hasi ziren lanean eta Sinergia Gunea abiatu zuten.

“Kaleak kulturarako berreskuratu nahi ditugulako, kalean, Judimendiko parkean elkartzea erabaki dugu”. Kalean aurkeztuko dituzte gazte hauek guztiek euren proiektuak, euren ideiak, euren lana. Hamabost proiektu izango dira guztira. Besteak beste, Cristina Bereciartua, kudeaketan aditua, Ane Gebara ipuin kontalaria, Instagramer-a, Jo! Fest diseinu jaialdiko antolatzaileak, Fill in grafitigileak, Irantzu Lekue artista eta muralista edo horma irudigilea, Sumendi gune autogestionatuko kideak, Iker Fidalgo arte kritikaria, Eider Bernaola, argazkilaria, Cerdas fanzine egileen kolektiboa, Beñat Goitia bakarlaria, Natalia Albeniz artista, Reina Ginolanda idazlea, Gasteiz Harcore Crew-ko kideak edo Ibai Jammin-ek parte hartuko dute “kulturakoak ez baina ekintzailetzatik datozen beste proiektu batzuekin, Gastheiz patata garagardoaren egileak kasu”. Denak arabarrak eta guztiak 18 eta 33 urteen artekoak “kulturan, sormenean ari diren gazteentzako izango den marko propioa eraiki nahi dugulako”, azaldu dute.

Irailaren 30a aurkezpen dinamika batekin hasiko da eta, ondoren, proiektu aurkezpenen txanda izango da. Antolatzaileek azaldu dutenaren arabera “dinamikotasuna bermatzeko 10 minutuko aurkezpenak egingo dituzte gonbidatuek. “Hasierako aurkezpen pertsonalen ostean proiektuak azkar aurkeztea hobetu dugu ondoren antolatu dugun marianito kulturalean hitz egiteko tartea dutela bermatzeko. Gertakari bat minutu batean azaldu badaiteke, proiektu bat zazpi minututan aski ongi azaldu daiteke ere”.

Sinergia Gunea sustatzeaz gain, Gindi Auzmendik, Mikel Sáez de Buruaga-k eta Iñaki Landa-k urrian aurkeztuko dute orain bukatzen ari diren Orainaldian Laissez faire dokumentala. Kultur alternatiboaren maparekin bete zuten lehen helburua: kultur guneak ezagutaraztea. Orain, Sinergia Gunea-rekin gazteen artean bide berriak eraiki nahi izan dituzte eta dokumentala ekoiztean, hiriko gazteen proiektuak ezagunagoak izan daitezen lortu nahi dute, Gasteizen bertan eta Euskal Herri osoan. «Dokumental bat egin nahi genuen, Gasteizko kulturaren inguruan eta... nahigabe, bururatzen zitzaizkigun denak... pertsona nagusiak ziren, ibilbide luzearekin baina denak gizonezkoak, nagusiak eta gehienak erdaldunak». Eszena berria dago Gasteizen, eta horren berri emango dute dokumentalean.

Fotos

Vídeos